Жеңіл көлік автобуспен соқтығысқан
Алматы облысында жеңіл көлік пен автобус соғылып, салдарынан көлік жүргізушісі көз жұмды, деп хабарлайды Almaty-akshamy.kz.
Облыстық полиция департаменті баспасөз қызметінің мәліметінше, оқиға 23 тамызда сағат 05:40 шамасында Алматы-Бішкек тасжолының 92 шақырымында болған.
«Лада» көлігінің 33 жастағы жүргізушісі рөлді басқара алмай, қарсы жолаққа шығып кетіп, автобуспен соқтығысқан. Жеңіл көлік жүргізушісі оқиға орнында қаза тапты», - делінген ПД хабарламасында.
Автобус жүргізушісі Ұзынағаш ауылындағы ауруханаға жатқызылды.
Қазіргі кезде аталған оқиға бойынша ҚР Қылмыстық кодексінің 345-бабында көзделген сотқа дейінгі тергеу басталды.