Алматы қаласы Спорт басқармасының бастамасымен бұқаралық спортты, салауатты өмір салтын және отбасылық демалысты насихаттауға бағытталған ALMATY MOVE жаңа қалалық жобасы басталды, – деп хабарлайды aqshamnews.kz тілшісі.
Бұл туралы Алматы қаласы Спорт басқармасының өкілдері хабарлады.
Алматының барлық сегіз ауданын қамтитын жоба маусымнан қыркүйекке дейін әр демалыс сайын өткізіледі.
27 маусым күні жоба аясындағы алғашқы іс-шаралар Түрксіб және Жетісу аудандарында өтті. Тұрғындарға арналған Kids Lab отбасылық спорт фестивалі аясында балалар эстафеталары, уақытпен есептелетін шағын жарыстар, қимылды ойындар, танымдық белсенділіктер, аквагрим алаңы мен анимациялық кейіпкерлермен фотосессия ұйымдастырылды. Жоба жүздеген отбасы қатысып, демалыс күнін спортпен әрі көтеріңкі көңіл күйде өткізді.
Әр айда қатысушыларға жаңа тақырыптағы бағдарлама ұсынылады. Шілде айында йога, стретчинг және тыныс алу жаттығулары өтсе, тамызда жаттықтырушылармен бірге кешкі жүгірулер мен жүгіру мәдениетіне арналған ашық дәрістер ұйымдастырылады. Ал қыркүйекте экологиялық плоггинг-жүгірулер, шебердің дәрістері және қоршаған ортаға ұқыпты қарау мәдениетін қалыптастыруға бағытталған өзге де іс-шаралар өткізіледі.
ALMATY MOVE жобасының басты мақсаты – спортты әрбір тұрғын үшін қолжетімді ету, қала аудандарында жаңа қоғамдық белсенділік ортасын қалыптастыру және отбасылардың демалыс күндерін белсенді әрі пайдалы өткізу дәстүрін нығайту.