Алматыда Қазақстан-Үндістан бизнес-кездесуі өтіп, тараптар сауда, инвестиция және фармацевтика саласындағы ынтымақтастықты кеңейту мәселесін талқылады, деп хабарлайды Aqshamnews.kz тілшісі.
Алматы Үндістанмен бизнес және инвестиция саласындағы әріптестікті одан әрі нығайтуды көздеп отыр. Бұл бүгін өткен Қазақстан-Үндістан бизнес-кездесуінде белгілі болды.
Ауқымды жиынға 50-ге жуық шетелдік компания қатысып, оған Алматы қаласының әкімі Дархан Сатыбалды да қатысты. Кездесуде екіжақты экономикалық ынтымақтастықтың қазіргі ахуалы мен алдағы мүмкіндіктері талқыланды.
Сарапшылардың айтуынша, кейінгі жылдары Қазақстан мен Үндістан арасындағы іскерлік байланыс айтарлықтай күшейген. Мәселен, өткен жылы екі ел арасындағы тауар айналымы 340 миллион долларға жеткен. Бұл өзара экономикалық серіктестіктің нығайып келе жатқанын көрсетеді.
Жүздесу барысында фармацевтика саласына ерекше назар аударылды. Қазір Алматыда осы бағытта арнайы кластерлер құрылып, ғылыми орталықтар ашылған. Сонымен қатар жаңа өндіріс орындары да іске қосылып жатыр.
Үндістан Республикасының Қазақстандағы елшісі Сайлас Тангалдың айтуынша, бүгінгі кездесуге Үндістаннан 44 компания қатысып отыр. Делегация құрамында 65 адам бар.
Оның сөзінше, олардың қатарында дәрі-дәрмек пен белсенді фармацевтикалық заттарды өндірушілер, импорт-экспорт және инновация саласында жұмыс істейтін кәсіпкерлер бар. Үндістан тарапының мақсаты – Қазақстанмен сауда байланысын күшейтіп, бизнесті ынталандыру, сондай-ақ инвестициялық бастамалар мен өндірісті кеңейту мүмкіндіктерін қарастыру.