Бұл туралы компания төрағасы Нань И «Алматы – Шанхай» бизнес форумында мәлімдеді, – деп хабарлайды aqshamnews.kz тілшісі.
Қытайлық Wontai Group компаниясы Қазақстанда жаңартылатын энергия көздері бойынша 15 жобаны жүзеге асырды.
Оның айтуынша, компания Орталық Азия нарығына 2018 жылы кірген. Содан бері қазақстандық серіктестермен бірге күн энергетикасы мен энергия сақтау жүйелері бағытында бірнеше жобаны жүзеге асырып, пайдалануға берген.
«Қазір іске қосылған 15 жоба «жасыл» электр қуатын өндіруге мүмкіндік беріп отыр. Бұл өңірдегі орнықты энергетиканы дамытуға қосылған елеуі үлес», – деді Нань И.
Ол Қазақстанның компания үшін негізгі шетелдік нарықтардың біріне айналғанына тоқталды. Бұған қолайлы инвестициялық ахуал, тұрақты мемлекеттік саясат және энергетика саласының жоғары даму әлеуеті әсер еткен.
Соңғы жылдары елде инвесторлар үшін жағдай айтарлықтай жақсарып, әсіресе энергетика секторында нарықтық механизмдер дамып, реттеу ашық бола түскен.
Сонымен қатар Нань И Алматы мен Шанхай арасындағы іскерлік және көлік байланыстарының нығайып келе жатқанын айтты. Әуе қатынасы кеңейіп, бизнес қауымдастықтар арасындағы өзара әрекет күшейген. Қазақстан жолдарында қытайлық электр көліктері көбейіп келеді.
«Алматы мен Шанхай – өз елдерінің ірі экономикалық орталықтары. Олар өзара тиімді ынтымақтастықты дамыту үшін үлкен әлеуетке ие», – деді ол.
Wontai Group басшысы екі тараптың артықшылықтарына да тоқталды: Шанхай қаржы, логистика және жоғары технология саласында алда болса, Қазақстан энергетика мен табиғи ресурстар бойынша мықты.
«Біз бірлескен жобаларды кеңейтуге үлкен мүмкіндік көріп отырмыз және қазақстандық серіктестермен ынтымақтастықты жалғастыруға дайынбыз», – деп сөзін қорытындылады Нань И.