Алматы әкімі Ерболат Досаев Қытайға жұмыс сапары аясында Қытайдың Экспорт-импорт банкі (China Exim Bank) президенті Ван Чуньинмен кездесті, деп хабарлайды aqshamnews.kz
Келіссөздердің басты тақырыбы – қаланың метро желісін кеңейтуге арналған инфрақұрылымдық жобаларды қаржыландыру. Ерболат Досаев екіжақты ынтымақтастықтың маңыздылығын атап өтіп, қаржыландыру шарттарын талқылауға дайын екенін білдірді. Ван Чуньин банктің Қазақстанда 16 жылдық тәжірибесі бар екенін айтып, жол-көлік инфрақұрылымы саласындағы жобаларды қолдауға дайын екенін жеткізді. Тараптар серіктестікті нығайту үшін бірлескен жұмысты жалғастыруға ниет білдірді. China Exim Bank (Қытай Эксимбанкі) сыртқы сауданы, инвестицияларды және халықаралық экономикалық ынтымақтастықты қолдаумен айналысады. Оның әлемнің әртүрлі елдерінде өкілдігі мен бөлімшесі бар.
