Алматы қалалық мәслихатының депутаты Қарашаш Жүзеева жұмыс пен оқу уақытын өзгерту арқылы таңғы және кешкі қарбалас сәттерде көлік кептелісін азайтуды ұсынды. Бұл бастама қаладағы көлік ағынын реттеуге және тұрғындардың өмір сапасын жақсартуға бағытталған.
Ұсынысқа сәйкес, екі ауысымды оқыту жүйесі бар мектеп оқушылары мен студенттердің сабақтары жарты сағат ертерек - таңғы 7:30-да басталуы мүмкін. Ал кәсіпорындар мен холдингтердің жұмыс күні сағат 9:00-ден 8:30-ға ауыстырылса, жеке компаниялар - банк, үкіметтік емес ұйымдар, нотариалдық кеңселер мен жарнама агенттіктерінің қызметкерлеріне қашықтан жұмыс істеу форматына көшу қарастырылып отыр.
Депутат жеке мектептерге де назар аударды: оларды оқушылар үшін автобус жалдауға шақырды. Бұл шара таңғы уақытта жеке көліктердің санын азайтуға мүмкіндік береді.
Жүзееваның айтуынша, мұндай өзгерістер жол қозғалысын жеңілдетіп қана қоймай, қала тұрғындарының уақытын үнемдеуге және экологиялық жағдайды жақсартуға сеп болады.
"Колледждер мен жоғары оқу орындарындағы сабақ басталу уақытын, ірі ұйымдардағы жұмыс кестесін өзгерту жолды босатып, қалалық инфрақұрылымның тиімділігін арттырады. Өйткені шамадан тыс жүктелген жол ауа сапасына да, тұрғындардың денсаулығына да тікелей әсер етеді", – деп атап өтті қалалық мәслихат депутаты.