Қалалық кардиология орталығында «Созылмалы жүрек жеткіліксіздігін емдеудің заманауи стандарттары және стационарлық-амбулаториялық көмектің сабақтастығы» тақырыбында кардиологтар, терапевтер және жалпы практика дәрігерлеріне арналған дөңгелек үстел өтті.
Жиынға қатысушыларға Алматы қаласы Қоғамдық денсаулық сақтау басқармасының бас штаттан тыс кардиологы, Қалалық кардиология орталығы директорының орынбасары Аргүл Разбекова Алматыдағы қан айналымы жүйесі ауруларына қатысты өзекті статистикалық деректерді ұсынды. Кездесу барысында созылмалы жүрек жеткіліксіздігі (СЖЖ) кабинеттерінің жұмысы, ТКА-орталықтарының қызметі, сондай-ақ пациенттерге медициналық көмек көрсетуге қатысты негізгі ұйымдастырушылық және проблемалық мәселелер талқыланды.
Бөлек бөлім СЖЖ-ны емдеудің заманауи тәсілдеріне арналды: медикаментозды терапияның ерекшеліктері, квадротерапия принциптері және қолданыстағы халықаралық стандарттар қарастырылды. Сонымен қатар, мамандар хирургиялық емдеу әдістерін, оның ішінде орталықта соңғы екі жыл бойы сәтті қолданылып келе жатқан сол жақ қарыншаның жасанды құрылғысын (LVAD) имплантациялауды талқылады. Мұндай оталар бүгінде тек ұлттық орталықтарда ғана емес, қалалық деңгейде де орындалатыны атап өтілді. Орталықта жүрек трансплантациясымен қатар LVAD имплантациясы да жүргізіледі, ал барлық пациенттер тұрақты динамикалық бақылауда болады.
Кездесуге стационар дәрігерлері және ПМСП ұйымдарының мамандары қатысты.
«Пациенттерді маршрутизациялау, көмек деңгейлері арасындағы сабақтастық және мамандар арасындағы коммуникацияны жақсарту мәселелері талқыланды. Сондай-ақ СЖЖ бар пациенттерді қашықтан бақылауға арналған «Амандық» мобильді қосымшасы таныстырылды. Медициналық қызметкерлерге пациенттерді жүргізуге арналған тиісті модульге қолжетімділік берілді», — деп атап өтті Аргүл Разбекова.
Орталықта әр түрлі деңгейдегі мамандарды біріктіру, тәжірибе алмасу және жүрек-қан тамырлары аурулары бар науқастарға көмек көрсету жүйесін жетілдіру үшін ай сайын осындай дөңгелек үстелдер өткізу жоспарлануда.