Алматы қаласы бойынша ҚАЖ департаментінің №11 мекемесінде “Шектеусіз оқу” жобасы аясында жазасын өтеуші жасөспірімдер арасында “Кітап оқуға құштарлық” байқауы өтті.
Оған Алматы қаласының Жамбыл атындағы қалалық жасөпірімдер кітапханасының оқырмандарға қызмет көрсету бөлімінің меңгерушісі Нұрлыхан Жұмахан және Шарайна Құмарова қазылық етті. Сонымен қатар, мекемедегі жалпы білім беретін мектептің өкілдері, тіл мамандары А.Алиева мен Е.Бутенко қатысты.
Байқауға қатысқан он төрт жазалы жасөпірім өздері оқыған әр шығарманың мазмұнын, берер тәрбиесін, жастарға үлгі болар тұсын нақтылап жеткізе білді. Сондай-ақ, олардың жырды мәнерлеп, нақышына келтіріп орындауынан, қара сөзді беріле әсерлі әңгімелеуінен кітапты қызыға оқығандарын, сол арқылы көңілдеріне медеу, жандарына сая тапқандары сезілді.
Іс-шара барысында Абайдың, Бейімбет Майлинің, Бердібек Соқпақбаевтың және Асқар Сүлейменовтің, детектив шебері Агата Кристидің, орыстың атақты жазушыларының шығармаларымен қоса, қазіргі заман әдебиеті өкілдерінің шығармалары да тілге тиек болды.
Уақытын босқа өткізбей, көркем туынды оқуға бет бұрған жеткіншектердің еңбегі еленіп, сый-сыяпат және мекеме бастығы атынан мақтау қағаздар табыс етілді.
— Жасөспірімдердің кітап оқуға деген құштарлығы қуантады бізді. Кітап та тәрбие құралы. Аяғын жаза басып, сотты болған жастар ондағы кейіпкерлердің өмірінен, сөзінен үлгі алып, жақсылыққа ұмтылса, ой түйе білсе, біз үшін үлкен жетістік сол, — дейді мекеме бастығы әділет полковнигі Алмат Сүлейменов.