Алматы Энергетика және электронды техникалар колледжінде оқу ордасының 60 жылдығына арналған салтанатты жиын өтті.
Мерейтойлық жиынға аталмыш оқу ордасында ұзақ жылдар қызмет еткен еңбек ардагерлері мен қаламыздағы басқа да оқу орындарының басшылары қатысты. Осы жылдар ішінде колледж ел өмірінің дамуына елеулі үлесін қосты.
Электр энергиясы мен жарықсыз даму мүмкін емес. Елімізде АЭС құрылысының қолға алынуы да осы қажеттілікті қамтиды. Алматы Энергетика және электронды техникалар колледжі – болашақта осындай алпауыт станцияларға қажет мамандарды даярлайтын жетекші оқу орны. Осыған орай үлкен жұмыстар қолға алынуда.
Алғашында "Энергоқұрылыс техникумы" деп аталған оқу ордасы заман талабына сай атауын бірнеше мәрте өзгертіп, қазіргі таңда "Алматы Энергетика және электронды техникалар колледжі" деген атпен нарыққа қажетті мамандар даярлап келеді. 60 жыл ішінде оқу орны 30 мыңға жуық білікті маман даярлап шығарды.
Мерейтой аясында бірнеше жаңа шеберхана ашылды:
- "TESLO" ЖШС және "SMART LIGHT GROUP" ЖШС қолдауымен "Ақылды үй" автоматтандырылған басқару жүйесі шеберханасы;
- "KAZ ENERGO POWER" ЖШС қолдауымен "Релелік қорғаныс және автоматика" шеберханасы;
- "Legrand" компаниясының қолдауымен "Электр жабдықтарын орнату" шеберханасы.
Колледждің 60 жылдық тарихы оның білім беру саласындағы маңыздылығын тағы да дәлелдей түседі.
Тақырыпқа орай:
Бағдәулет АБЫЗБАЕВ, Алматы энергетика және электронды технологиялар колледжінің директоры:
– Қазіргі кезде колледжімізде 1500-ден астам студент білім алып жатыр. Олар күндізгі және сырттай бөлімдерде білім алады. Оқу мемлекеттік және орыс тілінде жүргізіледі. Колледж еліміздегі ең алдыңғы оқу орнының бірі деп танылса, бұл ең алдымен материалдық-техникалық базаға да байланысты. Біздің колледж заманауи оқу орындарының бірі. Үш оқу корпусы бар. Сонымен қатар, 33 оқу кабинеті, 30 лаборатория,
14 оқу-өндірістік шеберханасы бар. Білікті маман даярлау үшін ең алдымен оқытушы өз білімін заман талабына сәйкес жетілдіріп отыруы керек. Осы орайда соңғы жылдары 60-тан астам оқытушымыз АҚШ, Англия, Чехия, Германия, Түркия, Франция, Сингапур, Малайзия, Венгрия, Словакия, Жапония, Бразилия, Беларусь мемлекеттеріне барып, біліктіліктерін көтеріп қайтты. Біздің колледж сапалы білім берумен қатар, салауатты ұрпақ тәрбиелеу жолында да үнемі белсенділік танытып келеді. Еліміздің энергетика саласын дамыту үшін біз қашанда өз үлесімізді қосуға дайынбыз!