2023 жылы Алматы қаласы экономикалық өсім бойынша рекордтық көрсеткішке қол жеткізді. Бұл туралы Орталық коммуникациялар қызметінде өткен брифингте Алматы әкімі Ерболат Досаев хабарлады. Оның айтуынша, қала экономикасының тұрақты даму қарқыны алдағы жылдары да жалғасын табады, деп хабарлайды aqshamnews.kz
2024 жылдың 11 айының қорытындысы бойынша Алматының қысқа мерзімді экономикалық индикаторы 6,6%-ға дейін өсті. Бұл қаладағы әлеуметтік-экономикалық даму бағдарламаларының тиімді жүзеге асырылып жатқанын көрсетеді. 2024 жылдың қорытындысы бойынша экономиканың жалпы өсімі 5,5%-ды құрайды деп болжануда, ал 2025 жылы бұл көрсеткіш 6,4%-ға дейін жеделдейді.
Алматының жалпы өңірлік өнімі 2023 жылы 24,8 трлн теңгеге жетті, бұл соңғы 10 жылдағы ең жоғары көрсеткіш болып табылады. Экономиканың негізгі драйверлері ретінде өңдеу өнеркәсібі, сауда, қаржы және сақтандыру қызметі (+12%), ақпарат және байланыс салалары айқындалды.
Алматының экономикалық тұрақтылығы мен жоғары әлеуеті оны Орталық Азияның жетекші экономикалық орталықтарының бірі ретінде көрсетіп отыр. «Мемлекет басшысының тапсырмаларын және қаламыздың даму бағдарламасын тиімді жүзеге асыру оның экономикасының тұрақты өсуімен тығыз байланысты», – деді Ерболат Досаев.
2025 жылға қарай Алматының экономикалық дамуы одан әрі жеделдеп, өңірдің тұрақты дамуына қосымша серпін береді деп күтілуде. Бұл көрсеткіштер Алматының ел экономикасындағы басты рөлін айқындай түседі.
Алматы өз тұрғындары мен бизнесіне қолайлы жағдай жасап, Қазақстанның және Орталық Азияның экономикалық дамуының көшбасшысы болуды жалғастыруда.