Жылдың ең көп күткен музыкалық кештерінің біріне санаулы минуттар қалды — Алматыдағы Орталық стадионда Дженнифер Лопестің әлемдік туры Up All Night аясындағы грандиозды концерті басталмақ.
Бүгін күн бойы мұнда көрермендер мен стадионның жай-күйіне ерекше көңіл бөлінді. «Алматы Тазалық» қызметі аумақты үнемі аралап, қоқысты жылдам жинап, қоқыс жәшіктерін босатып, әр бұрыштың таза әрі ұқыпты болуын қадағалады. Олардың үйлесімді жұмысы мен еріктілердің қолдауының арқасында аумақ жайлы әрі мерекелік күйінде сақталып, қонақтардың сәтті тамашалауына ештеңе кедергі келтірмеді.
Ұйымдастырушылар бұл шаралар республикалық «Таза Қазақстан» экологиялық акциясының бір бөлігі екенін атап өтті. Акция мақсаты — концертке жайлы жағдай жасау ғана емес, қаланы аялаудың маңыздылығын еске салу. Бүгін Алматы әлемдік супержұлдызды бар сұлулығымен, тазалығымен және қонақжайлығымен қарсы алып отыр.