Француз даму институтымен ынтымақтастық туралы меморандум креативті индустрияның 9 саласын қамтиды.
2024 жылғы 4 қарашада Парижде Мемлекет басшысының сапары кезінде Almaty Creative және француз даму институты ынтымақтастық туралы меморандумға қол қойды. Серіктестік қазақстандық креативті сала өкілдеріне тәжірибе алмасу, оқыту және кәсіби байланыстарды кеңейту үшін платформа ұсына отырып, мәдени және шығармашылық индустрияларды дамытуға бағытталған.
Ынтымақтастық аудиовизуалды сектор және кино, орындаушылық өнер, музыка, дизайн, сәулет, қолөнер, цифрлық шығармашылық (бейне ойындар, иммерсивті тәжірибе), әдебиет және сән сияқты негізгі бағыттарды қамтиды. Меморандум шеңберінде қазақстандық мамандар үшін бірегей мүмкіндіктер беріліп, фестивальдар, көрмелер, шеберлік сыныптары, конференциялар, сондай-ақ резиденциялар мен кәсіби кездесулер ұйымдастырылады.
«Біз, шығармашылық мамандарымыз шабыт алып қана қоймай, дами алатын, өз жобаларын халықаралық деңгейде жүзеге асыратын және елдің экономикасы мен мәдени өміріне үлес қосатын жағдай жасауға тырысамыз. Француз институтымен ынтымақтастық - бұл Қазақстанның әлемдік креативті қоғамдастыққа интеграциялануындағы маңызды қадам», - деп атап өтті Almaty creative өнеркәсіпті дамыту департаментінің директоры Шолпан Махмудова.
Францияның даму институтының өкілі Мод Жиру (Maud Girout) айтып өткендей, меморандум сонымен қатар Франция мен Қазақстан арасындағы мәдени ынтымақтастықты кеңейтуге және экономикалық байланыстарды нығайтуға мүмкіндік береді.
«Біз қазақстандық мамандармен ынтымақтастықта мәдени және іскерлік байланыстарды нығайтуға және креативті жобалар үшін жаңа перспективалар ашуға көмектесетін үлкен әлеуетті көріп отырмыз. Біздің ортақ күш-жігеріміз тұрақты даму мен инклюзивтілікке бағытталған, ал бұл, өз кезегінде табысты және ұзақ мерзімді серіктестіктің негізі болады», - деп атап өтті Жиру.