Әуезов және Түрксіб аудандарындағы көп қабатты тұрғын үйлердің аулаларында тазалықты қамтамасыз ететін мердігерлер анықталып, аула тазалауды қолға алды. Қала әкімі Ерболат Досаевтың өкімімен биыл аулаларды тазартуға бюджеттен қаржы бөлінген болатын.
Жайық АЛТАЙҰЛЫ, Әуезов ауданы әкімі аппаратының коммуналдық шаруашылық бөлімінің бас маманы:
- Қала әкімінің тапсырмасымен 1 қаңтардан бастап аула аумағын тазалау жұмыстары жүргізілуде. Әуезов ауданы бойынша 10 мердігер компания жұмыс істейді. Тұрғындар тарапынан қоқыс жәшіктері мен аула аумағындағы балалар ойнайтын алаңды тазалау жөнінде арыз-шағымдар бар. Сол бойынша тиісті шаралар қабылдануда. Кіре беріс, жаяу жүргінші жолдары, қоқыс жәшіктері тазаланады. Жұмыс барысы таңертең сағат 8-ден кешкі сағат 17.00-ге дейін күнделікті жүргізіледі. Аудан бойынша 500-ден астам жұмысшы, 47 техника бар. «Сайран», «Тастақ» ықшамаудандарындағы 16 аула тазалануда. Одан бөлек, қар жауғанда мобильдік топ жұмыс істейтін болады», - дейді мердігер ұйымның басшысы Руслан Жарасбаев.
Айдос БЕКЕТАЕВ, Түрксіб ауданы әкімінің орынбасары:
- Алматы қаласы әкімінің тапсырмасымен аулаларды тазалауға бюджеттен қаржы бөлінген болатын. Қазіргі таңда Түрксіб ауданында 594 аула бар. Осы аулаларға барлығы 36 мердігер компания қызмет көрсетеді. Дәл қазір Түрксіб ауданындағы «Алтай» ықшамауданы, Майлин көшесі, 71 аула аумағына «Строй сервис» компаниясының 34 жұмысшысы және техникалар жұмылдырылды. Олар ауладағы мұзды ойып, қарды тазалайды, тротуарларды қардан тазартып, қоқыстардан арылтады, балалардың ойын алаңы да ретке келтіріледі. Біз барынша аула тазалаушы жұмысшылардың бәрін жұмыспен қамтуға, жұмыссыз қалдырмауға тырысамыз. Олар әркім өз жағдайына байланысты кейбірі толық жұмыс күніне келіседі, кейбірі денсаулығына, отбасылық жағдайына байланысты толық емес жұмыс күнін таңдайды. Жұмысшылардың арасында зейнет жасындағы адамдар да бар. Әркімнің еңбегіне қарай, жұмыс көлеміне қарай жалақысы төленеді.
Жайна БАЙКЕШОВА, Түрксіб ауданының тұрғыны:
-Түрксіб ауданының әкіміне, әкімнің орынбасарларына, Тұрғын үй шаруашылығы бөлімінің қызметкерлеріне алғысымызды білдіреміз. Ауламыз үнемі уақытында тазаланады. Аула тазалаушылар ай сайын келіп қарды тазалап, жолдарды ашып кетеді. Биыл қар мол түсті. Ауламыз көлеңке жақ болғандықтан көшелерге жиі мұз қатып, балалардың, қарт адамдардың жүруіне қиындық туғызатыны рас. Ал әкімдіктің жұмысшылары демалыс, мереке күндеріне қарамастан өз жұмыстарына жауапкершілікпен қарайды, әрдайым келіп ауланы тазартып отырады. Сол үшін барша тұрғындардың атынан әкімшілікке ризашылығымызды білдіреміз.
