«Auezov City» тұрғындарының өзекті мәселелері шешілді
Алматы әкімі Дархан Сатыбалды жұмыс сапары барысында «Auezov City» тұрғын үй кешеніне барып, тұрғындармен кездесті. Кездесуде инженерлік инфрақұрылым, абаттандыру және аумақтың қауіпсіздігіне қатысты өзекті мәселелер талқыланды, - деп хабарлайды Aqshamnews.kz.
Тұрғындар бірқатар ұсыныс айтып, шағымдарын жеткізді. Атап айтқанда, инженерлік желілерді қаланың балансына беру, шлагбаум орнату және полиция тірек пунктін ашу қажеттігі көтерілді. Сондай-ақ, Әуезов көшесі бойындағы тротуарларды коммерциялық нысандардың заңсыз иеленуіне қатысты мәселе қозғалды.
Кездесу қорытындысы бойынша әкім тиісті басқармалар мен коммуналдық қызметтерге нақты тапсырмалар берді. Инженерлік желілерді сумен жабдықтау, кәріз және жылу жүйелерін қаланың балансына беру үдерісін жеделдету жөнінде шешім қабылданды. Қазір желілердің бір бөлігі қабылданды, қалғаны жақын күндері рәсімделеді. Алғашқы он блоктың тұрғындары қоғамдық келісімге ауыстырылды, қалғандары бойынша жұмыс бірнеше күн ішінде аяқталады.
Полиция тірек пунктін «RAMS EVO» тұрғын үй кешенінде 2026 жылдың екінші тоқсанында орнату жоспарланып отыр.
Дархан Сатыбалды тұрғындардың барлық өтінішін жедел қарап, нақты шара қабылдауды тапсырды.
«Барлық заңсыз иелену тоқтатылады. Біз жұмыс тәсілін өзгертіп отырмыз, енді көше кешенді түрде «қасбеттен қасбетке дейін» әдісі бойынша тексеріледі. Егер кімде-кім тротуарды немесе өзге аумақты өз бетінше иеленсе, ол нысандар бұзылады. Тәртіп барлығына бірдей болуға тиіс», – деді қала әкімі.
Сапар соңында Дархан Сатыбалды Медеу ауданын сумен қамтамасыз ететін «Думан» таза су резервуарының қайта жаңғырту барысын тексерді. Нысан он жыл бұрын салынған, бірақ анықталған ақауларға байланысты әлі пайдалануға берілмеген.
Әкім «Алматы Су» АҚ мен жобалық ұйымдарға жобалық шешімдердің дұрыстығын мұқият тексеріп, кемшіліктерді жою және қайта жаңғырту жұмыстарын жеделдетуді тапсырды.
Дархан Сатыбалды бұл жобаның стратегиялық маңызына тоқталып, резервуардың маңайында орналасқан тұрғын үй аймағының сумен қамтылуын тұрақтандыруға мүмкіндік беретінін атап өтті.
