Еліміздің барлық мектептерінде алғашқы қоңырау соғылды.
Білім күні Білім және ғылым министрлігінің қабылдаған шешіміне сәйкес, мектеп табалдырығын алғаш аттаған балаларға мерекелік жиын өткізілді, деп хабарлайды Almaty-akshamy.kz.
Алматы қаласындағы ақиық ақын Мұқағали Мақатаев атындағы №140 гимназияда «Алғашқы қоңырау» рәсімі 4 мезгілге бөлініп өткізілді. Себебі 1 сыныпқа қабылданған 300-ге жуық шәкіртті бір уақытта мектеп ауласына жинаудың өзі карантин талаптарына қайшы келетіндігі айтпаса да түсінікті.
Әдеттегідей Әнұран орындалып, іс-шараға қатысушыларды гимназия директоры Тілеубай Сәния Өскенбайқызы Білім күнімен құттықтап, мектеп табалдырығын аттаған өрендеріне өнер, білім, ғылым жолында мұқалмайтын күш-қайрат тіледі, "Өрлеу" БАҰО" АҚ филиалы Алматы қаласы бойынша ПҚ БАИ өкілі Асылбек Перуза Өзенбекқызы сөз кезегінде мектеп табалдырыған тарыдай болып аттаған бүлдіршіндердің елін, жерін, дәстүрін құрметтейтін, сауатты, білімді ұрпақ болып қалыптасуына деген ізгі тілегін білдірді.
Білім ордасын алғаш аттаған бүлдіршін қолындағы гүл шоқтары, үкілі үмітін жетелеген ата-ана, құшағы гүлге толған ұстаздар мектеп ауласын ерекше қуанышқа бөлейді. Алғашқы қоңыру соғылған соң, 1 сынып оқушыларына алғашқы оқулығы – «Әліппе» үлестірілді. Әр шәкірттің жүрегінде мәңгі сақталатын алғашқы ұстаздары сыныпқа қарай жол бастады. Тәуелсіз еліміздің тізгінін ұстайтын бүлдіршіндер «Әліппесін» құшақтап, білім айдынының ақ кемесіне мініп барады.
