Бүгін, 22 тамызда, қазақстандық паралимпиадашылардың бір тобы Парижге ұшып кетті. 28 тамыз бен 8 қыркүйек аралығында Франция астанасында XVII Жазғы Паралимпиада ойындары өтеді.
Қазақстанның делегация құрамына отырып ойнайтын волейбол, параүстел теннисі және паражүзу спорт түрлерінен ұлттық құрамалардың спортшылары енді, деп хабарлайды Мәдениет және спорт министрлігі.
Министрлік атап өткендей, Қазақстан отырып ойнайтын волейболдан 28 жыл ішінде алғаш рет қатысады, ал параүстел теннисінде алғаш рет өнер көрсетеді.
Жалпы, Париждегі Паралимпиадада Қазақстанның 9 спорт түрінен 33 лицензиясы бар. Бұл ойындарға Қазақстаннан 44 спортшы қатысады, бұл елдің Жазғы Паралимпиада ойындарына қатысу тарихындағы ең үлкен делегация болмақ.