Аты аңызға айналған Джеки Чан "Құдай сауыты - 4: Ultimatum" ("Доспехи Бога 4: Ultimatum") фильмін Маңғыстау облысында түсіруі мүмкін. Түсірілім тобы Ақтауға келіп, аумақты зерттеуге кіріскен, - деп хабарлайды aqshamnews.kz Lada.kz-ке сілтеме жасап.
1986 жылы алғаш шыққан "Құдай сауыты" фильмі - Джеки Чан фильмографиясындағы ең ерекше жобалардың бірі саналады. Фильмнің жалғасы туралы жаңалық әлемнің түкпір-түкпіріндегі жанкүйерлердің қызығушылығын оятты, ал Маңғыстаудың түсірілім алаңы ретінде таңдалуы Қазақстан киноиндустриясы үшін маңызды оқиғаға айналуы мүмкін.
Түсірілім тобы келген күні Маңғыстау облысының әкімімен кездесті. Кездесуде ұйымдастыру мәселелері және өңір аумағында түсірілім процесін жүргізу шаралары талқыланды.
Жоба толық мақұлданған жағдайда, Маңғыстау жаһандық кинематографиялық тарихтың бір бөлігіне айналып, Джеки Чан қатысатын ірі халықаралық экшн-фильмде алғаш рет көрінуі мүмкін.
Айта кетейік, шетелдік туристер өңірдің көрікті жерлерін бірнеше рет атап өткен. Мәселен, әзербайжандық әнші әрі кәсіпкер Emin "Бұл жердің ертегі емес, шын екеніне сене алмаймын" деген.
