«Таза Қазақстан» республикалық акциясы аясында Алматы қаласы Түрксіб ауданының комьюнити орталығында жастар және экология саласында белсенді азаматтардың қатысуымен «Әлемді бірге сақтайық» атты дөңгелек үстел өтті, деп хабарлайды almaty-akshamy.kz.
Шараның негізгі мақсаты – экологияға тигізетін зиянды азайту, қоршаған ортаны қорғау жолдарында белсенділік таныту және жауапкершілікті арттыру. Дөңгелек үстел барысында қатысушылар экологияны сақтау бағытында қандай нақты қадамдар жасалуы керектігі туралы пікір алмасты.
Талқылау барысында экологиялық құзыреттілікті дамыту, табиғатты қорғау және қазіргі таңдағы экологиялық мәселелерді шешу жолдары қарастырылды. Әсіресе, өндіріс орындарынан шығатын қоқыстарды тиімді басқару және зиянды қалдықтарды азайту мәселелері көтерілді. Жастардың экологияға деген қызығушылығы мен оларды шешуге деген ұмтылысы ерекше назар аудартты.
«Жастар ел болашағы екенін ескерсек, олардың қоршаған ортаны қорғау мәселесіне шынайы қызығушылық танытуы қуантады. Олар бұл мәселеде тек сөзбен ғана емес, нақты іс-әрекеттерімен де үлес қосып жүр. Біздің шараның мақсаты – осы белсенділікті арттыру және оларды бірлесе жұмыс істеуге ынталандыру», – деді шараны ұйымдастырушы Абдуали Расул Жеңісұлы.
Шара соңында қатысушылар табиғатты қорғау бағытындағы жұмыстарын жалғастыруға және жұмыла жұмыс істеуге уағдаласты.