Әлемдегі ең ірі шөл Сахарада сирек кездесетін табиғи құбылыс тіркеліп, құм арасын қар басты, деп хабарлайды Aqshamnews.kz тілшісі.
Сахара шөлінде қар жаууы тағы да көпшілікті таңғалдырды. Сирек кездесетін бұл құбылыс 10–11 наурыз күндері Солтүстік Африкаға ылғалды ауа массаларының келуімен байланысты болды. Синоптиктердің мәліметінше, Пиреней түбегінен ойыс аймақ жылжып келіп, өңірге ылғал әкелген, ал оның суық ауа ағындарымен түйісуі қысқы ауа райын қалыптастырған.
Қар негізінен Атлас таулары мен биік аймақтарға түскен. Алайда шөл жиегінде де ақ ұлпа қар байқалған. Weather.com дерегінше, дәл осы Атлас жоталары маңында Жерорта теңізінен келген ылғалды ауа биіктегі суық ауа қабаттарымен соқтығысып, тіпті шөлге жақын аумақтарда да қардың түсуіне жағдай жасайды.
Мамандар мұндай құбылыс өте сирек болатынын айтады. Кей мәліметтерге қарағанда, Сахара маңындағы мұндай қар шамамен он жылда бір рет қана байқалады.
Дегенмен шөлдегі қар ұзақ жатпайды. Қазірдің өзінде Солтүстік Африкада күн қайта ашылып, ауа температурасы көтерілген. Соған байланысты қар жамылғысы тез еріп, алдағы күндері шөлде қар күтілмейді.