Маусым айында азық-түлік тауарларының әлемдік бағасы аздап төмендеді.
ФАО ет бағасының индексі маусым айында кезекті рет рекордтық деңгейге – 124,7 пунктке жетті. Бұл мамыр айындағы көрсеткіштен 1,7%-ға және 2021 жылғы маусым деңгейінен 12,7%-ға жоғары. Бұл туралы Біріккен Ұлттар Ұйымының Азық-түлік және ауылшаруашылық ұйымының (ФАО) шолуында айтылған, деп хабарлайды Almaty-akshamy.kz.
«Барлық ет түрлерінің әлемдік бағасы өсті, бірақ басқаларға қарағанда рекордтық деңгейге дейін құс еті қымбаттады, өйткені Украинадағы соғыс пен Солтүстік жарты шарда құс тұмауының өршуіне байланысты әлемдік нарықтағы ұсыныс әлі де шектеулі. Қытай Бразилиядан ет импорттауға салған тыйымын алып тастаған соң сиыр етінің бағасы көтерілді», - делінген ФАО шолуында.
Шолудағы дерек бойынша, шошқа еті бағасының шамалы өсуі бірқатар жетекші импорттаушылардан сатып алудың артуына байланысты болған. Дегенмен Қытай әлі де шошқа етін шектеулі мөлшерде сатып алады. Қой етінің әлемдік бағасының өсуіне Солтүстік Азия елдерінің сұранысының аздығына қарамастан, Жаңа Зеландиядағы экспорттық қорлардың азаюы себеп болған.
ФАО деректері бойынша маусым айында азық-түлік тауарларының әлемдік бағасы аздап төмендеді, мұндай тренд қатарынан үшінші ай байқалады. Бұл ретте азық-түлік тауарларына баға индексінің мәні 2021 жылғы маусымдағы көрсеткіштен 23,1%-ға жоғары болып қалады. Өткен айда өсімдік майларына, дәнді дақылдар мен қантқа әлемдік бағаның төмендеуі байқалды.