Мексикада өткен «Әлем аруы» халықаралық байқауында Қазақстан атынан өнер көрсеткен Мадина Альмұханованың қатысуымен Өңірлік коммуникациялар қызметінің алаңында баспасөз конференциясы өтті. Ол байқауға қатысу барысында алған әсерлері мен тәжірибесі жайлы әңгімелеп, өз ойымен бөлісті.
«Осындай ауқымды байқауда өз еліңді таныстыру – мен үшін зор құрмет пен жауапкершілік. Қазақстанның мәдени байлығын көрсетіп, еліміздің бірегейлігін таныта алғаныма қуаныштымын», – деді ол.
Қазақстан атынан қатысқан ару байқауға әлемнің 125 елінен қатысушылар келгенін және тығыз кестенің маңызды сынақ болғанын айтты.
«Алғашқы төрт күнде тіркеу мен фотосессиялар өтті. Ұйқыға уақыт өте аз бөлінді, кезегімізді күтуге көп уақыт жұмсалды. Кейін басты финалға дайындық басталды», – деп бөлісті Мадина.
Ол әсіресе ұлттық костюмдер мен әшекейлерді таныстыру кезеңінен ерекше әсер алғанын атап өтті. Қазақстандық ұлттық зергерлік бұйымдар көптеген қатысушылардың қызығушылығын тудырған.
«Мен өзіммен бірге шекелік пен шашбау әкелдім. Біздің зергерлік бұйымдарымыз шетелдік қатысушылардың назарын бірден аударды. Олар бұл әшекейлердің мағынасы туралы сұрап, қызығушылық танытты. Сонымен қатар, мен қазақстандық шоколад сыйлықтарын ала бардым, барлығы оның дәміне тәнті болды», – деді ол.
Мадина бұл байқауға қатысу оған өзін-өзі дамытуда жаңа көкжиектер ашып, құнды тәжірибе бергенін айтты.
«Бұл байқау менің өзіме деген сенімімді арттырды. Осындай деңгейдегі конкурсқа қатысқаннан кейін іштей бір күш пайда болды. Енді мен одан да үлкен жетістіктерге жетуге болатынын түсіндім», – деді ол.
«Қазақстан аруы» байқауының PR-директоры Гүлім Советқан «Әлем аруы» конкурсының сұлулық саласындағы беделді іс-шаралардың бірі болып қала беретінін атап өтті. Алайда, биыл Қазақстан мен Орталық Азия елдеріне жеткілікті назар аударылмағандықтан, еліміздің өкілдері топтарға ене алмады.
Ұйымдастырушылар кез келген байқауда жеңістер мен жеңілістер болатынын атап өтіп, болашақта байқауды жетілдіру үшін ұсыныстарды ескеруге дайын екендіктерін білдірді.