Биыл 90 шақырымнан астам жаңа жолдың құрылысы басталды, деп хабарлайды aqshamnews.kz тілшісі.
Алатау ауданындағы Шапағат, Теректі, Болашақ пен Рахат-Мәдениет шағын ауданында биыл ұзындығы 272,4 шақырым болатын сумен жабдықтайтын желі мен кәріз желісінің құрылысы аяқталады. Бұл жобаларды іске асыру шамамен 34 мың тұрғынды орталықтандырылған коммуналдық қызметтермен қамтамасыз етуге мүмкіндік береді. Инженерлік және көлік инфрақұрылымының қазіргі даму барысы туралы Өңірлік коммуникациялар қызметінде өткен брифингте Данияр Қырықбаев толығырақ баяндады.
«Инженерлік инфрақұрылымды аумақтардың өсуімен қатар дамыту – негізгі міндеттің бірі. Бұл жобалардың аяқталуы тұрғындарды орталықтандырылған сумен жабдықтап, кәріз жүйесімен қамтып, коммуналдық қызметтің қолжетімділігін арттыруға мүмкіндік береді», – дейді аудан әкімі.
Алатау ауданының 13 пен 14 аумағында да қосымша жұмыс істеліп жатыр. Мұнда жалпы ұзындығы 33,2 шақырым болатын орталықтандырылған кәріз желісі салынады. Бұл жұмысты келер жылы бірінші тоқсанда аяқтамақшы.
Сонымен қатар жол желісі де дамып келеді. Биыл Боралдай, Теректі мен Рахат-Мәдениет шағын ауданында 78,3 шақырым жаңа жол салынады. Рысқұлов даңғылында тағы 2,3 шақырым, Тілендиев көшесінде 10,5 шақырым жаңа жол салынып жатыр.
Осылайша, биыл 90 шақырымнан астам жаңа жолдың құрылысы басталды.
Жаңа құрылыс жұмысынан бөлек, жалпы ұзындығы 61,1 шақырым болатын 95 көшеге орташа жөндеу жүргізіледі. Қазір 47 шақырым жол жөнделді.
Қосымша ауданда 3 мың шаршы метр тротуар абаттандырылып, 130 құдық қақпағын орнатып жатыр.
«Жол және инженерлік инфрақұрылымды дамыту – ауданның одан әрі кешенді дамуының негізі. Жаңа тұрғын үй аумақтарын игерумен қатар жолдар, инженерлік желілер және қалалық инфрақұрылымның басқа да элементтері салынуы қажет», – деп атап өтті Данияр Қырықбаев.