Алматы төріндегі ҚР Ұлттық кітапханасында Павлодар облыстық Бұқар жырау атындағы әдебиет және өнер музейінің өкілдері көшпелі көрме мен республикалық конференция ұйымдастырды, – деп хабарлайды aqshamnews.kz тілшісі.
«Ертіс бойының жауһарлары» атты көрмеде Павлодар өңірінен табылған Абай Құнанбайұлының алғашқы жыр кітабы, ғұлама Мәшһүр Жүсіптің тұмары мен Шәкен Аймановтың «Алдаркөсе» фильмінде киген бөркі, Жүсіпбек Аймауытов, Жұмат Шанин, Жанбике Шанина, Иса Байзақов, Шәкен Айманов, Кәукен Кенжетаев, Нұтфолла Шәкенов, Мұзафар Әлімбаев, Қалмұқан Исабаев және тағы да басқа ұлт тұлғаларының жеке заттары, Ертіс бойының мәдениеті мен өнеріне қатысты өзге де жәдігерлер таныстырылды.
Іс-шара барысында Бұқар жырау атындағы әдебиет және өнер музейінің ұйытқы болуымен биыл жарық көрген екі кітаптың тұсауы кесілді.
«Бірінші кітап – «Қартқожа Тоғанбаев». Онда Жүсіпбек Аймауытовтың әйгілі «Қартқожа» романындағы негізгі кейіпкер, Алаш қозғалысының қайраткері, аудармашы, публицист Қартқожа Тоғанбаевтың өмірі мен қызметіне қатысты архивтік құжаттар, фотосуреттер мен зерттеу мақалалары жинақталған. Ал екіншісі – «Күретамыр». Онда Халық әртісі, әнші, актёр Кәукен Кенжетаевтың әкесі, халық ауыз әдебиеті үлгілері мен фольклор мұраларын жинаушы Кенжетай Аймановтың өлеңдері мен ел аузынан жазып алған аңыз-хикаялары, қисса-шежірелері жинақталған», – деді Павлодар облыстық Бұқар жырау атындағы әдебиет және өнер музейінің басшысы Ербол Қайыров.
«Баянтаудан Алатауға: рух сабақтастығы» атты республикалық ғылыми-мәдени конференция жұмысына елімізге танымал әдебиеттанушы ғалымдар, Ертістің Павлодар өңірінен шыққан ғылым мен мәдениет, әдебиет пен өнер қайраткерлерінің ұрпақтары қатысты.
Нұржамал ӘЛІШ