Бразилия төрінде өткен халықаралық байқауда қазақстандық карикатурашының еңбегі жоғары бағаланды, - деп хабарлайды Aqshamnews.kz тілшісі.
2025 жылы Бразилияда өткен 5-ші Халықаралық орган донорлығы тақырыбындағы карикатура байқауының нәтижелері жарияланды. Биылғы конкурсқа әлемнің түкпір-түкпірінен суретшілер қатысып, қоғамдағы маңызды медициналық әрі гуманистік тақырыпты бейнелеуде өз көзқарасын ұсынған.
Бұл байқауды Бразилиядағы Габриель атты Ағза ауыстыру институты ұйымдастырған.
Қазақстан атынан қатысқан Alatau Aqparat медиахолдингі карикатурашысы Ғалым Смағұлұлы ынталандыру сыйлығына ие болды. Оның жұмысы адам өмірін құтқарудағы донордың маңызын терең астармен жеткізгені үшін қазылар тарапынан жоғары баға алды.
"Суретте форма табу керек. Тақырыпты заманауиландырып бердім. Нәтижесінде осындай туынды шықты", - дейді Ғалым Смағұлұлы.
Еске салайық, бұған дейін Ғалым Смағұлұлы Ыстамбұлдағы 16-шы Халықаралық туристік карикатурашылар байқауында Фехми Кофтеоглу атындағы жүлдені жеңіп алған еді.