Кейінгі үш жылда Алакөлге 4,8 миллион турист келген, - деп хабарлайды aqshamnews.kz тілшісі.
Аудан әкімдігінің мәліметі бойынша, биыл 51 жұмыс орны ашылып, 17 туристік нысан іске қосылған. Нәтижесінде 2,4 млрд теңге инвестиция тартылды. Сонымен қатар, 500 орындық 3 ірі туристік нысанның құрылысы жүргізіліп жатыр.
Туризммен қатар қауіпсіздік пен инфрақұрылым да күшейтілді: жағалауда бейнебақылау камералары мен дрондар көмегімен қоғамдық тәртіп пен судағы қауіпсіздік қадағаланып жатыр.
Тыйым салынған аймақтарда жүзіп жүрген су көліктеріне айыппұл салынып, инспекторлар саны артты. Сонымен қатар, жағалауға жедел жәрдем, дәріхана, 22 санитарлық-гигиеналық торап, 180 қоқыс контейнері және жаңа медициналық пункттер қойылды.
Электр тапшылығын жою үшін "Ақши" қосалқы станциясы іске қосылып, 56 шақырым жоғары кернеулі желі тартылды. Бұл - болашақтағы жүктемелерді де ескеретін ұзақмерзімді шешім.
Ал Ақши ауылында кәріз жүйесі мен тазарту құрылғысы салынып жатыр. Байланысты жақсарту үшін 16 базалық станция жұмыс істеп, оптикалық интернет желісі тартылған.
Жетісу облысы Алакөл ауданын туризм, көлік-логистика, әлеуметтік инфрақұрылым бағытында кешенді түрде дамытып келеді.