Қазақ өнерінің киелі қара шаңырағы – Мұхтар Әуезов атындағы Ұлттық академиялық драма театрының актерлері ұжым болып екпе салғызды.
Бүгінде қаламызда коронавирус індетінің дес бермей тұрғаны баршамызға аян. Бұл ретте COVID-19-ға төтеп беретін бірден-бір жол вакцина екенін айтқан актерлер театрдың 96-маусымының шымылдығын ашуға дайын екендерін жеткізді. Сондай-ақ, былтыр ұжымдағы кей актерлердің осы бір қатерлі індетке шалдыққанын айтып, сол күндердің қайталанбауын тілейді. Сонымен қатар, театр ұжымы түрлі қауесет әңгімелерге құлақ түрмей, екпе ектіру керегін айтып отыр.
«Бұл індет сахна өнеріне де зиянын тигізді. Біз екі жылға жуық бірде жабылып, бірде ашылып, белгілі бір шектеулермен жұмыс істеп, былайша айтқанда, көрермендерімізбен ара қатынасымыз қыл үстінде тұрғандай жағдайды бастан кешірдік. Карантиндік режим жеңілдеген соң, театр ұжымының барлық актері екпе салғызды. Ұжымның 90%-ы екпенің екі компонентін де алды. Қазіргі таңда денсаулығымыз бірқалыпты, ауру-сырқаудан аманбыз, – дейді М.Әуезов атындағы Қазақ ұлттық драма театрының директоры Еркін Жуасбек.
Жақын арада көрерменге есігін айқара ашатын өнер иелері тың туындыларымен дайын отыр. «Осы жазда ұжымдасқан түрде еңбек демалысына шықтық. Күз мезгілінен бастап өз жұмысымызға кіріскелі жатырмыз. Карантин талаптары жеңілдей бастағандықтан, басқа қалаларға гастрольдік сапарға, жаңа спектакльдерге толыққанды дайындық жүргізіп жатырмыз. Біздің өміріміз көрермендерімізбен мәнді. Өздеріңізбен қайта қауышатынымызға қуаныштымыз. Бір-біріміздің, айналамыздың амандығы үшін барша отандасымды екпе алуға шақырамын», – дейді Еркін Жуасбек.