«Almaty Theatre» сахнасында Мұхтар Әуезов атындағы Қазақ ұлттық драма театрының 99-маусымы ресми түрде ашылды. Ашылу қойылымы ретінде Ғабит Мүсіреповтің «Қозы Көрпеш – Баян сұлу» спектаклі көрсетілді.
Маусымашар баспасөз мәслихатында театр директоры, Қазақстанның еңбек сіңірген қайраткері Еркін Жуасбек театр ғимаратының екі жылға жөндеуге жабылатынын атап өтті.
Жөндеу жұмыстары 2026 жылы аяқталмақ. Сол себепті театр ұжымы гастрольдік сапарлар аясында Талғар, Есік, Қаскелең, Ұзынағаш, Қонаев қалаларында өнер көрсетуді жалғастырады.
Бұдан бөлек, биыл Ақтөбе, Қостанай және Қырғызстанның Бішкек қаласында да спектакльдер қою жоспарланып отыр. Жөндеу жұмыстары кезінде жаңа қойылымдар дайындалмайды, себебі декорация мен киім тігу цехтары театр ғимаратында қалған.
Қазақстанның Еңбек Ері, КСРО және Қазақстанның халық артисі, театрдың көркемдік жетекшісі Асанәлі Әшімов театр ұжымына сәттілік тілеп, театрдың дәстүрін жастардың жалғастыруы керектігін атап өтті. Сонымен қатар, салтанатты іс-шара барысында Қазақстанның еңбек сіңірген қайраткері, қоюшы режиссер Әлімбек Оразбековтің кітабының тұсаукесері өтті.
Театр ұжымы алдағы екі жылда репертуарындағы 70 спектакльді көрерменге көрсетуді жоспарлап отыр.