Қаралы қаңтар кезіндегі 4 жасар қыздың өлімі: қыздың әкесі сот залына кіргізілмеді
Алматы гарнизонының әскери сотында қаңтар оқиғасы кезінде қаза тапқан төрт жасар Айкөркем Мелдеханның ісі бойынша кезекті сот отырысы өтіп жатыр. Іс құпия, сот жабық өтті, деп хабарлайды Almaty-akshamy.kz Zakon.kz-ке сілтеме жасап.
14 тамызда қоғам белсенділері мен БАҚ өкілдері әскери соттың жанына жиналды. Процесс жабық есік жағдайында өтіп жатыр, сот залына тіпті марқұм қыздың әкесін де кіргізбеді.
Мұны сот өкілдері істе мемлекеттік құпия болғандықтан, қыздың әкесі әлі рұқсат алмағанымен түсіндірді. Сондықтан процесс жабық, оның ішінде баспасөзге де рұқсат берілмеді.
Қыздың әкесі Айдос Мелдехан соттан марқұм қызының атына шақырту жібергені үшін кешірім сұрауды талап етіп отыр.
Төрт жасар Айкөркем Мелдеханның өліміне қатысты сот процесі шілде айының соңында басталған. Қылмыстық істі қарау барысы Бас әскери прокуратураның бақылауында. Ведомство бұдан бұрын іс материалдарында жария етуге жатпайтын құпия құжаттар бар екенін айтқан еді.
Төрт жасар Айкөркем мен 15 жастағы Жанель Мелдехан отырған көлікке 2022 жылдың 7 қаңтарында сағат 19:00-де Сейфуллин мен Сәтбаев көшелерінің қиылысында бірнеше рет оқ атылды. Айкөркем сол жерде көз жұмды, әпкесі оқтан жарақат алды. Іс бойынша сотталушы – әскери қызметкер.