ҚР Ғылым және жоғары білім министрлігі Ғылым комитеті Философия, саясаттану және дінтану институтының бас директоры Айгүл Сәдуақасова Халық кеңесінің тарихи тәжірибесі мен маңызы туралы айтып, оның өңірлердің мүддесін айқын білдіруде маңызды рөл атқаратынын мәлімдеді.
Директордың айтуынша, Қазақстанда соңғы 3–4 жылдағы әкімшілік реформалар нәтижесінде жаңа өңірлер қалыптасып, инновациялық смарт қалалардың құрылысы басталды. Бұл өңірлердің әлеуетін арттыруға мүмкіндік беріп, Халық кеңесінің дауысы айқын шығуына жол ашады.
Айгүл Сәдуақасова атап өткендей, Халық кеңесі кенеттен пайда болған орган емес, ол елдің 35 жылдық егемендік тәжірибесіне сүйенеді. Оның тарихында 1995 жылы құрылған Қазақстан халық ассамблеясы, 2003 жылдан бері дәстүрлі түрде өтетін Әлемдік және дәстүрлі діндер лидерлерінің съездері және соңғы 5 жылда белсенді жұмыс істеп келе жатқан ашық сарапшылар алаңы – Ұлттық Құрылтай бар.
Осы институттар тәжірибесін жинақтап, Халық кеңесі жаңа институционалдық деңгейге көтеріліп, өңірлердің өмір сүру деңгейі мен локалды мүдделерін қорғаудағы маңызды алаңға айналып келеді.