ҚР ІІМ Ұлттық ұланы «Оңтүстік» өңірлік қолбасшылығының жауынгерлік қарудан ату бойынша жеке командалық біріншілігі Шымкенттегі 6506 әскери бөлімінің “Ақтас” оқу орталығының базасында өтті, деп хабарлайды almaty-akshamy.kz.
«Оңтүстік» өңірлік қолбасшылығының дене шынықтыру және спорт бастығы подполковник Салауат Төреғалиевтің жетекшілігімен өткен жарысқа Алматы, Шымкент, Тараз, Қызылорда және Талдықорған қалаларынан Ұлттық ұланның 50-ден астам әскери қызметшісі қатысты. Сондай-ақ, сайыста атыс қаруын ату дағдыларын әйел әскери қызметшілер де көрсетті.
Жаттығуларда Макаров тапаншасы, Калашников автоматы және Драгуновтың мергендік винтовкасы қолданылды.
Екі күндік жарыстың қорытындысында бірінші жалпы командалық орынды 5547 әскери бөлімінің командасы (Қызылорда қаласы), екінші орынды 5513 әскери бөлімінің командасы (Тараз қаласы), ал үшінші орынды 6698 әскери бөлімінің командасы (Шымкент қаласы) иеленді.
“Бұл жарыстар әскери қызметшілерге өздерінің дағдылары мен кәсібиліктерін көрсетуге мүмкіндік беріп қана қоймай, Ұлттық ұланның жауынгерлік дайындығын нығайтуға септігін тигізді. Барлық жеңімпазды құттықтаймын. Біз қаруды тек оқу мақсатында қолданамыз деп үміттенемін”, - деді “Оңтүстік” өңірлік қолбасшылығы қолбасшысының орынбасары полковник Павел Ситников.