Бүгін — ұлттық рухымызды асқақтатып, киелі өнерімізді ұлықтайтын Ұлттық домбыра күні!
Домбыра – халқымыздың жаны, барлық бітім-болмысы, ғасырлар бойы елмен бірге жасасып келе жатқан киелі мұрасы.
Оның күмбірлеген қоңыр үні – ел бірлігінің, рухани сабақтастықтың нышаны. Бүгінгі ұрпақтың ата-баба мұрасын бағалап, домбыра үнін әуелете көтеріп келе жатқаны — қуанарлық жайт.
Ұлттық домбыра күні құрметіне Алматы қаласының Мультимедиялық дәстүрлі музыка орталығында Алатау, Наурызбай және Әуезов аудандарынан жиналған 125 оқушы “Балбырауын”, “Адай” күйлерін бір мезетте орындады.
Өнерді сүйетін жеткіншектерге белгілі өнер жұлдыздары — дәулескер күйші, ҚР Мәдениет қайраткері Мұрат Әбуғазы мен Мәдениет саласының үздігі, күйші Нұрлан Түменбай жетекшілік етті.
Ал дәстүрлі әнші, ҚР еңбек сіңірген қайраткері Сәуле Жанпейісова өзінің “Аманат” мектебінде дәріс алып жүрген 16 шәкіртімен “Домбыра” әнін бірге әуелетті. Ұстаз өнерді бағалай білетін өрендердің болашағына сәттілік тіледі.