Дзюдодан Қазақстан әйелдер командасының үздігі Абиба Әбужақынова олимпиадалық рейтингте үшінші, әлемдік рейтингте төртінші орынға көтерілді.
48 келі салмақта сынға түсетін Әбиба олимпиадалық рейтингте 4576 ұпаймен үшінші орында тұр, деп хабарлайды Almaty-akshamy.kz Olympic.kz-ке сілтеме жасап.
Бірінші орынға 5945 ұпай жинаған Ассунта Скутто (Италия), екінші орынға 5200 ұпаймен Нацуми Цунода орналасқан.
Әлемдік рейтингте жерлесіміз 5184 ұпаймен төртінші орында.
Айта кетелік, Әбиба Әбужақынова биыл өзі қатысқан ресми турнирлердің бәрінде үздік үштікке енді.
Португалияда өткен Гран-при турнирінде, Баку мен Антальядағы Grand Slam турнирінде қола жүлдегер атанса, Ташкенттегі Grand Slam-да күміске қол жеткізді.
Әбиба Әбужақынова дзюдодан қазақ қыздары арасында әлем чемпионаты мен Grand Slam турнирлерінен жүлде алған алғашқы спортшы. Сондай-ақ, ол Азия чемпионаты мен Азия ойындарының күміс жүлдегері.