Бұл өзгерістер Ішкі істер министрінің жаңа бұйрығы аясында енгізілген және шетелдіктердің Қазақстанда заңды түрде тұруын реттеуге бағытталған, деп хабарлайды aqshamnews.kz
Енді шетелдіктер Қазақстанда уақытша тұруға рұқсат алу үшін бірнеше құжатты ұсынуы қажет. Құжаттар тізімі келесі талаптарды қамтиды:
- Өтініш формасы — арнайы түрде толтырылуы тиіс.
- Жеке басын куәландыратын құжаттың көшірмесі — түпнұсқасы салыстыру үшін ұсынылады.
- Медициналық сақтандыру көшірмесі — тек шетелдіктер үшін қажет. ЕАЭО елдері азаматтары үшін бұл талап міндетті емес.
- Тұрғын үй иесінің нотариалды куәландырылған келісімі — егер өтініш беруші тұрғын үй алаңының меншік иесі болмаса, онда ол тұрғын үй иесінің келісімін ұсынуы қажет.
- Саусақ ізін өткізгені туралы анықтама — шетелдік азаматтардың жеке деректерін тіркеу үшін қажет.
Бұл құжаттар тізімі өтініш берушінің келу мақсатына байланысты өзгеруі мүмкін. Мысалы, отбасын біріктіру, жұмыс істеу, оқу немесе емделу сияқты мақсаттар бойынша келетіндер үшін қосымша талаптар қойылады.
Енді Қазақстанға жұмыс істеу үшін келген азаматтар шетелдік жұмыс күшін тартуға рұқсат пен біліктілігін растайтын қосымша құжаттарды ұсынуы керек. Өзгерістер тек жұмыс істеу үшін келгендерге ғана емес, сонымен қатар іскерлік иммигранттарға, студенттерге және медициналық емделуге немесе миссионерлік мақсаттарға келгендерге қатысты ережелерді де қамтиды.
Одан басқа, егер шетелдік құжаттары шет тілінде болса, оның нотариалды куәландырылған аудармасы да ұсынылуы қажет.
2024 жылдың 1 қаңтарынан бастап шетелдіктер мен азаматтығы жоқ адамдар Қазақстанда болу құжатын алу үшін саусақ ізін тіркеуге міндетті болады. Бұл өзгерістер елде шетелдіктердің қауіпсіздігін және заңсыз миграцияны болдырмауды мақсат етіп отыр.