Бостандық ауданында жол-көлік инфрақұрылымын дамыту жұмыстары жалғасып жатыр. Жолдың сапасын арттырып, тротуар салу мен мүмкіндігі шектеулі азаматтар үшін кедергісіз орта құру аудан әкімдігінің басым бағытының бірі болып отыр. 2024–2025 жылдары осы мақсатқа 5 млрд теңгеден астам қаржы бөлініп, ондаған көшеде үлкен өзгеріс басталған. Өңірлік коммуникациялар қызметінде Бостандық ауданының әкімі Санжар Әлин бұл жұмысты қалай атқарып жатқандарын айтып берді.
Өткен жылы ауданда 1,3 млрд теңгеге 33 көшедегі 30,5 шақырым жолға орташа жөндеу жұмысы жүргізіліпті. 2025 жылы жөндеу бағдарламасы жалғасады: 19 көшеде 27,5 шақырымдай жол жамылғысын жаңарту жоспарланған. Бұл мақсатқа 3 млрд теңге бөлінді. Орташа жөндеуден бөлек, биыл әдеткі жол жөндеу жұмыстары да қатар жүргізіліп, 30 мың шаршы метр асфальт жамылғысы қалпына келтірілген. Бұл жұмысқа 500 млн теңге жұмсалды. Жыл соңына дейін қосымша 10 мың шаршы метр асфальт жабынын жөндеу жоспарланып отыр, оған қосымша 150 млн теңге бөлінген.
Тротуарларды абаттандыруға ерекше көңіл бөлінген: 2025 жылы Өтепов, Әбіш Кекілбайұлы, Наурызбай батыр, Тілендиев, Садықов, Мұстафин, Розыбақиев, Радостовец, Шашкин, Торайғыров, Бұқар Жырау мен Померанцев көшелерін қоса алғанда, 12 көше техникалық тротуармен қамтамасыз етілді. Бұған 308 млн теңге бөлінді.
Биылғы тамыз айынан бастап 10 жаяу жүргіншілер өткелінде – бес жерүсті және бес жерасты өткелінде лифтілер мен көтергіштерді күрделі жөндеу және жаңғырту жұмыстары басталады. Бұлар ерекше қажеттілігі бар азаматтарға жайлы әрі қолжетімді қалалық орта қалыптастыруға бағытталған. Барлық жұмыс 2026 жылдың соңына дейін аяқталады.
Аталған жобаларды жүзеге асыру көше-жол желісінің сапасын едәуір жақсартып, қауіпсіз әрі жайлы ете түсуге мүмкіндік беріп отыр.
