Қазақтың ұлы ақыны, кемеңгер ойшылы, ұлт руханиятының шамшырағы Абай Құнанбайұлының есімі – тек әдебиет пен тарих беттерінде емес, елдің әр түкпірінде тасқа қашалып, жүрекке жазылған қасиетті атау. Aqshamnews.kz тілшісі ұлы тұлғаға арналған қай өңірлерде көше мен саябақ барын, қанша ескерткіш орнатылғанын анықтады.
33 елді мекен Абай атымен аталған
Павлодардан бастап Жетісуға, Түркістаннан Қарағандыға дейін – Павлодар, Ақтөбе, Қостанай, Жетісу, Абай, Түркістан, Қызылорда, Атырау, Қарағанды, Жамбыл, Алматы, Солтүстік Қазақстан, Батыс Қазақстан облыстарындағы 33 елді мекені Абай есімімен аталады.
1231 көше, алаң, саябақ
Мәдениет және ақпарат министрлігінің мәліметінше, Астана, Алматы, Шымкент қалаларында да, облыс орталықтары мен шағын ауылдарда да Абай есімімен аталатын 1231 құрамдас бөлік бар (Астана, Алматы, Шымкент қалалары және Павлодар, Ақтөбе, Қостанай, Жетісу, Абай, Түркістан, Қызылорда, Атырау, Маңғыстау, Қарағанды, Ұлытау, Жамбыл, Алматы, Батыс Қазақстан, Шығыс Қазақстан, Солтүстік Қазақстан облыстарында).
Caption
Әр көше өткен мен бүгінді жалғап, Абайдың даналығын еске салып тұрады.
125 мекеме – білім мен мәдениет ордалары
Бұл мекемелердің ішінде Абай есімімен Ақтөбе, Павлодар, Қарағанды, Жамбыл облыстарында кітапханалар, Қарағанды облысында әдеби- мемориалдық музей, Маңғыстау облысында мәдени-демалыс кешені, Жамбыл облысында Абай атындағы қазақ драма театры, Абай облысында Абайдың оқыған медресесі, тұрған үйі, музей-үйі және жерленген орнынан құралған Абайдың "Жидебай-Бөрілі" мемлекеттік тарихи-мәдени және әдеби-мемориалдық музей- қорығы, Абай атындағы мемлекеттік қазақ музыкалық драма театры және Алматы қаласында Абай атындағы Қазақ ұлттық академиялық опера және балет театры бар.
Ақорда
55 ескерткіш – мәңгілік бейне
Астана мен Алматыдан бастап, Маңғыстау мен Шығыс Қазақстанға дейін – 55 ескерткіш, бюст және мүсіндік композициялар орнатылған.
Алматыдағы Абай ескерткіші республикалық маңызы бар мәдени мұра тізіміне енсе, тағы оннан астамы жергілікті тарихи ескерткіш мәртебесіне ие.
depositphotos.com
Еске салайық, бұған дейін елімізде қанша Абай есімді адам бары айтылған еді. Қазір Қазақстанда Абай есімді 18 763 адам тұрады.