26 наурызда Қазақстанның басым бөлігінде ауа райы күрт құбылып, бірқатар өңірде тұман, көктайғақ, қатты жел, шаңды дауыл және найзағай сияқты қолайсыз құбылыстар күтіледі, – деп хабарлайды aqshamnews.kz тілшісі.
«Қазгидромет» РМК мәліметінше, 26 наурызда ел аумағының басым бөлігінде ауа райы тұрақсыз болады. Синоптиктер бірнеше өңірде тұман түсіп, жолдарда көктайғақ қалыптасатынын, сондай-ақ желдің күшейетінін ескертті.
Астанада түнде және таңертең тұман түсіп, жолдарда көктайғақ болады. Бұл көлік қозғалысына қиындық тудыруы мүмкін.
Алматы облысы мен Іле Алатауы аумағында шығыстан соғатын желдің жылдамдығы 18-23 м/с-қа дейін жетіп, кей сәттерде 28 м/с-қа дейін күшеюі ықтимал. Осындай жағдай Жетісу өңірінде де сақталады. Таулы аймақтарда тұман түсіп, Алакөл маңында жел екпіні 23-28 м/с-қа дейін барады.
Маңғыстау облысында жаңбыр мен найзағай күтіледі. Кей жерлерде тұман түсіп, шаңды дауыл тұруы мүмкін. Атырау облысында да тұман түсіп, желдің екпіні 15-20 м/с-қа жетеді.
Түркістан және Қызылорда облыстарында шаңды дауыл күшейіп, желдің жылдамдығы 15-20 м/с-қа дейін барады. Жамбыл облысында да ұқсас жағдай сақталып, таулы аудандарда тұман мен қатты жел күтіледі.
Қостанай, Ақмола, Солтүстік Қазақстан, Павлодар, Қарағанды және Ұлытау облыстарында тұман түсіп, түнгі және таңғы уақытта жолдарда көктайғақ болуы ықтимал.
Шығыс Қазақстан мен Абай облыстарында да тұман мен көктайғақ болжанып отыр. Кей жерлерде жел бағыты өзгеріп, оның екпіні 15-20 м/с-қа дейін күшеюі мүмкін.
Синоптиктер тұрғындарды ауа райының күрт өзгеруіне байланысты сақ болуға, әсіресе жолда барынша абай болуға шақырды.