ҚР көлік министрі Марат Қарабаев Үкімет отырысында теміржол жылжымалы құрамын жаңарту және вагондар паркін жаңарту бойынша жүргізіліп жатқан жұмыстар туралы баяндады, деп хабарлайды aqshamnews.kz.
Министрдің айтуынша, қазіргі уақытта локомотив паркінің жалпы саны шамамен 1,8 мың бірлікті құрайды, ал оның тозу деңгейі 61%-ды құрайды.
«Жылжымалы құраммен қамтамасыз ету және парктің тозу деңгейін төмендету мақсатында биыл 185 локомотив сатып алынды. Келесі жылы 187 бірлік сатып алу жоспарланған, ал одан кейінгі үш жылда тағы 257 локомотив жеткізіледі деп күтілуде. Бұл локомотивтердің жетіспеушілігін толық жоюға ықпал етеді», — деді министр.
Көлік министрлігінің мәліметінше, жүк вагондарының жалпы паркі 139 мың вагонды құрайды.
Нарықта 300-ден астам жеке операторлар жұмыс істейді. Олардың ішінде «Қазақстан темір жолы» 38 мың вагонға ие, олар еліміздің энергетикалық секторын қамтамасыз ету мен халыққа көмір тасымалдауда маңызды рөл атқарады.
2026 жылға дейін ұлттық оператор қосымша 3 мың ашық вагон сатып алуды жоспарлап отыр, оның 800 бірлігі биыл қолданысқа енгізілді.
Жолаушылар вагондары паркіне де ерекше назар аударылуда. Өткен жылы 118 жаңа вагон сатып алынған болса, биыл 143 бірлік жеткізіледі. Келесі жылы 226 вагон сатып алу жоспарланған.
«Жалпы, 2029 жылға дейін 1 мың 200-ге жуық жолаушылар вагондары сатып алынады, нәтижесінде вагон паркі 3 мың бірліктен асып, оның тозу деңгейі 38%-ға дейін төмендейді. Осы міндеттерді орындау үшін отандық өндірушілердің вагондарын сатып алу мүмкіндігімен жалға беретін Біріккен лизингтік компания құру ұсынылады», — деп мәлімдеді Марат Қарабаев.