Мемлекеттік аудит объектілерінің 2023 жылға арналған тізбесі қалыптастырылды
ҚР Жоғары аудиторлық палатасының төрағасы Наталья Годунова 2023 жылы елімізде қандай салаларға мемлекеттік аудит жүргізілетіндігін атады, деп хабарлайды Almaty-akshamy.kz ҚазАқпаратқа сілтеме жасап.
«ҚР Жоғары аудиторлық палатасы сіздердің квазимемлекеттік сектор субъектілерінің қаражатын екінші деңгейдегі банктердегі депозиттік шоттарға орналастыру тиімділігіне аудит, квазимемлекеттік сектор субъектілерінің өтімділігін ЕДБ басқаруының әлеуметтік-экономикалық салдарына және мұндай басқарудың банктік кредиттеу нарығының жағдайына ықпал етуіне аудит және талдау жүргізуге, өтімділікті басқарудың қолданыстағы моделін және мемлекеттің ұлттық қауіпсіздігін қамтамасыз етуді бағалауға қатысты жолданымдарыңызды қарап, мынаны хабарлайды. Сіздер қозғап отырған ұлттық экономикаға инвестиция салудың ішкі қайнар көздерін іздеу қажеттігі туралы мәселелер аса өзекті және Жоғары аудиторлық палатаның материалдарында және аудиттерінің қорытындыларында ұдайы көтеріледі», - делінген палата төрағасының Мәжіліс депутаттары сауалына берген жауабында.
Оның атап өтуінше, тиімділік аудиттерін қалыптастыру «Мемлекеттік аудит және қаржылық бақылау туралы» Заңның 18-бабына сәйкес жоспарлы негізде жүргізіледі. Осылайша, Жоғары аудиторлық палата мемлекеттік аудитті тәуекелдерді басқару жүйесін қолдану негізінде қалыптастырылған Мемлекеттік аудит объектілерінің тиісті жылға арналған тізбесіне сәйкес жүзеге асырады. Мемлекеттік аудит объектілерінің 2023 жылға арналған тізбесі Қазақстан Республикасы Парламентінің депуттары мен қоғам көтерген аса өзекті мәселелерді есепке ала отырып қалыптастырылды.
«Барлығы 9 аудит тобының болуына байланысты Мемлекеттік аудит объектілерінің 2023 жылға арналған тізбесінің жобасына толықтыру енгізу мүмкін болмай отыр. Бұдан бөлек, 2023 жылға арналған жұмыс жоспарының 28 пайызы Мемлекет басшысының және оның Әкімшілігінің тапсырмалары бойынша жүргізілетін аудиттерге тиесілі. Қазіргі уақытта тізбеде 2023 жылы жылу энергетикасының, орта білім беру мен денсаулық сақтаудағы, автомобиль және ауыл шаруашылығы машиналарын жасаудағы, көші-қондағы мемлекеттік-жекешелік әріптестік жобаларының, қорғаныс қабілеттілігі мен әскери қауіпсіздіктің тиімділігіне аудиттер, сондай-ақ Мемлекет басшысының тапсырмаларына сәйкес бірқатар жедел аудиттер жүргізу жоспарланған», - деді Наталья Годунова.