Елімізде өзін-өзі банкрот деп жариялауға ниеттілер көп.
Былтыр 83 мың адам өтініш берсе, биылғы үш айда өтініш саны 38 мыңға жуықтаған, деп хабарлайды aqshamnews.kz.
Мемлекеттік кірістер комитеті төрағасының орынбасары Сейілжан Ахметовтың айтуынша, соттан тыс банкроттық рәсіміне сұраныс көп. Оның аясында былтыр 11 мың адам банкрот деп танылды. Биыл 2 мыңнан астам азаматтың өтінімі мақұлданды.
Ұлттық банк мәліметіне сүйенсек, ақпанда мерзімі өткен несие көлемі 4%-ке өсіп, 24 млрд теңгеге жуықтады. Мұндай төлемдердің басым бөлігін тұтынушылық несиелер құрайды, екінші орында ипотекалық қарыз тұр. Бұл – 21,5 млрд теңге. Жалпы берешегінен құтылуға асықпайтындардың дені Алматы мен Астанада тұрады. Қос шаһардағы қарыз 280 млрд теңгеге тең.