18-ші емхананың жүктемесі көп.
Оның үш филиалында, медициналық қызметтер көрсетуге арналмаған үй-жайларында "Таугүл-3", "Мамыр", "Қуаныш", "Шабыт" және "Атамекен" шағынаудандарында тұратын 30 мыңнан астам адамға қызмет көрсетіледі, деп хабарлайды Almaty-akshamy.kz.
Әуезов ауданы тұрғындарымен өткен кездесуінде Алматы әкімі Ерболат Досаев аталған медициналық мекеменің мәселесін шешу үшін қандай жұмыстар жасалып жатқанына тоқталды.
«Менің тапсырмам бойынша өткен жылы наурыз айында "Мамыр-1" шағынауданында 200 адам қабылдайтын отбасылық-дәрігерлік амбулаторияның құрылысы басталды. Қазір жұмыстар 80% жасалды, биыл наурыз айында толық аяқталуы керек», - деді қала басшысы Е.Досаев.
Сондай-ақ "Қуаныш" шағынауданында №18 емхананың ауысымда 300 адам қабылдайтын жаңа негізгі ғимаратын салу үшін жер учаскесін сатып алу жұмысы жалғасуда. Қазіргі уақытта жер учаскесінің иесімен құны келісілуде. Осы айдың соңына дейін жер учаскесіне бағалау жүргізіледі. Жер учаскесінің иесі оның сомасымен келіскен жағдайда, жер учаскесі сатып алынады (бюджетті бірінші нақтылағаннан кейін). Келіспеген жағдайда, жер учаскесі сотпен алынады.