Қазақстанда 1 маусымды қосымша демалыс күні ретінде белгілеу мүмкіндігіне қатысты Үкімет пікір білдірді, - деп хабарлайды Аqshamnews.kz тілшісі.
Еңбек және халықты әлеуметтік қорғау бірінші вице-министрі Асқарбек Ертаевтың айтуынша, бұл мәселе қазіргі уақытта талқыланып жатыр.
"Бүгінде Қазақстанда 10 мемлекеттік мереке бар. Мұндай кез келген ұсыныс мемлекеттік органдармен қаралып, келісіліп отырады. 1 маусым бойынша расында да ұсыныс болды, қазір бұл мәселе мемлекеттік органдармен, сарапшылармен бірге талқыланып жатыр. Нәтижесін сіздерге міндетті түрде жеткіземіз. Қыркүйекке дейін бұл талқылаулар аяқталады", – деді Ертаев үкіметтегі брифингте.
Сондай-ақ, вице-премьер Ермек Көшербаевқа елімізде мерекелер мен демалыс күнінің көп болуы экономикалық жағдайға әсер етпей ме деген сұрақ қойылды.
"Басқа елдермен, әсіресе экономикасы жақсы дамыған мемлекеттермен салыстырғанда, бізде мерекелер көптеу. Бұл, әрине, әсер етуі мүмкін. Бірақ өндірісі тоқтамай жұмыс істейтін кәсіпорындар бәрібір жұмысын жалғастырады. Әрине, мереке күндері ондағы әкімшілік заңнамаға сәйкес қосымша ақы төлеуі керек. Ал сол күндері жұмыс істегендерге демалыс немесе қосымша еңбек демалысы берілуге тиіс", – деп жауап берді Көшербаев.