Ағылшынның атақты «Челси» футбол клубы 16 жастағы қазақстандық шабуылшы Дастан Сатпаевты өз академиясына қабылдады. Бұрын ол «Қайрат» клубының жасөспірімдер командасында ойнап, жоғары шеберлігімен көзге түскен. Бұл туралы BBC журналисі Низар Кинселла әлеуметтік желідегі парақшасында хабарлады.
Сатпаев өткен жылдың желтоқсан айында «Челсиде» сынақтан өткен. Жас шабуылшының шеберлігі клуб өкілдерін қатты таң қалдырған. 2024 жылғы маусымда Дастан Қазақстанның U-19 құрамасында және QJ лигасында ойнап, тамаша нәтижелер көрсетті. 12 матчта ол 19 гол соғып, 7 нәтижелі пас берген.
Еуропа клубтарының Орталық Азия ойыншыларына деген қызығушылығының өсуі байқалады. Бұған дейін «Манчестер Сити» өзбек қорғаушысы Абдукодир Хусановпен келісімшарт жасасқан еді. Енді «Челси» де осы бағытты ұстана отырып, қазақстандық жас талантқа сенім артуда.
Сатпаевтың ресми таныстырылымы оның 18 жасқа толғаннан кейін өтеді деп күтілуде. Қазіргі уақытта «Қайрат» пен «Челси» арасындағы келісімнің егжей-тегжейлері жарияланған жоқ. Дегенмен, BBC инсайдерінің мәліметінше, барлық тараптар келісімге келген.
Алдағы уақытта Дастан «Челсидің» жасөспірімдер командаларында өнер көрсетеді. Егер ол ағылшын футболына сәтті бейімделсе, негізгі құрамға кіруге мүмкіндік алады.