8 қаңтарда Петропавл – Астана тас жолында ауыр жол-көлік оқиғасы тіркелді, деп хабарлайды Аqshamnews.kz тілшісі.
Полицияның мәліметінше, Toyota Camry жеңіл көлігі мен Shacman маркалы жүк көлігі соқтығысқан. Апат салдарынан Toyota көлігіндегі төрт адам – жүргізуші және үш жолаушы оқиға орнында қаза болды.
Солтүстік Қазақстан облысы полиция департаменті оқиғаға байланысты қылмыстық іс қозғалып, сотқа дейінгі тергеу басталғанын хабарлады.
Алдын ала мәлімет бойынша, Toyota көлігін 25 жастағы жігіт басқарған және ол Астанаға бағыт алған. Жолаушылар арасында 63 жастағы әйел және 14 пен 17 жастағы екі жасөспірім болған. Марқұм әйел немерелерінің дүниеге келгенін естіп, оларды көру үшін жолға шыққаны айтылды.
Тәртіп сақшылары апат болған учаскеде қар мен мұздың болмағанын атап өтті. Бастапқы болжамға сәйкес, жеңіл көлік қарсы бағытқа шығып кетіп, соның салдарынан екі көлік жолдан шығып, соқтығысқан.
Қазір оқиғаның барлық мән-жайын анықтау жұмыстары жүргізіліп жатыр.