Алматы облысында ірі жол апатынан алты адам қаза тапты, деп хабарлайды Aqshamnews.kz тілшісі.
Алдын ала мәлімет бойынша, қайғылы оқиға Алматы – Бішкек автожолының 65-шақырымында, Қайнар ауылына жақын маңда болған. Полиция департаментінің хабарлауынша, 23 жастағы Audi көлігінің жүргізушісі рөлге ие бола алмай, қарсы бағытта келе жатқан Toyota маркалы көлікпен соқтығысқан.
Жол апаты салдарынан екі көліктің жүргізушілері және тағы үш жолаушы алған жарақаттарынан оқиға орнында көз жұмды. Бір жолаушы ауруханаға жеткізілгенімен, дәрігерлер оның өмірін сақтап қала алмады. Тағы бес адам түрлі дәрежедегі жарақат алып, дәрігерлер бақылауында жатыр.
Полиция қазір бұл факті бойынша сотқа дейінгі тергеу бастағанын мәлімдеді. Қажетті сот-медициналық сараптамалар тағайындалып, Алматы облысының ПД басшылығы тергеу барысын ерекше бақылауға алған.