Мәжіліс депутаты Асхат Аймағамбетов медицина қызметкерлері мен жедел жәрдем жүргізушілеріне шабуыл жасағандарға жазаны күшейту туралы заң жобасын таныстырды. Депутат өз сөзінде әділетсіздік пен дәрігерлердің қорғансыздығын нақты мысалдармен дәлелдеді, - деп хабарлайды aqshamnews.kz тілшісі.
Депутат сөзін Қостанайда болған оқиғадан бастады. Онда тәжірибелі уролог науқас тарапынан соққыға жығылып, ауыр жарақат алған. Дәрігер 4 ай бойы жұмысқа шыға алмаған.
"Бұл маман ауырған 4 айдың ішінде 960 адамды емдер еді. Яғни, бір дәрігерді соққыға жығу – іс жүзінде мың қазақстандықты ем-домсыз қалдыру деген сөз", – деді Аймағамбетов.
Сондай-ақ, жедел жәрдем қызметкерлеріне жасалған шабуылдың салдары одан да ауыр. Жүргізуші мен фельдшер жарақат алған кезде, жедел жәрдем көлігі тоқтап қалады. Бұл – инфаркт немесе инсульт алған науқасқа көмектің кешігуі, яғни өмір мен өлім мәселесі.
Егерь мен дәрігер: Заң алдындағы теңсіздік
Депутат қолданыстағы заңнамадағы парадоксты атап өтті. Қазір егерьге немесе жануарлар инспекторына шабуыл жасаған адам 12 жылға дейін сотталуы мүмкін (ҚК 380-2 бабы). Ал адам өмірін арашалайтын реаниматологқа шабуыл жасау қарапайым бұзақылық ретінде қарастырылып, қылмыскер айыппұлмен құтылып кетеді.
"Егер біз орман қорғайтын инспекторды, прокурор мен сотты, қаруы бар полицейді қорғасақ, онда қолында бір ғана фонендоскопы бар, науқастарға көмекке баратын дәрігерді қорғауға міндеттіміз", – деп атап өтті депутат.
Жаңа заң не ұсынады?
Заң жобасы аясында Қылмыстық кодекске жаңа 380-3-бап енгізу ұсынылып жатыр. Ол бойынша:
- "Медицина қызметкері" және "жедел медициналық жәрдем жүргізушісі" арнайы қорғалатын субъектіге айналады.
- Оларға шабуыл жасағаны үшін жаза едәуір қатаңдатылады.
Асхат Аймағамбетов бұл заң тек дәрігерлер үшін емес, ең алдымен, дер кезінде көмек күтіп отырған қарапайым халықтың, балалар мен қариялардың құқығын қорғау үшін қажет екенін жеткізді.