Мемлекет басшысы Қасым-Жомарт Тоқаев барлық деңгейдегі мәслихат депутаттарының ІІІ республикалық форумында сөйлеген сөзінде әлемдегі қазіргі саяси және экономикалық ахуалға тоқталды, – деп хабарлайды aqshamnews.kz тілшісі.
Президенттің айтуынша, бүгінгі таңда жаһандық жағдай тұрақсыз әрі күрделі кезеңді бастан өткеріп отыр. Соңғы жылдары халықаралық аренада түрлі қақтығыстар мен геосаяси шиеленістер күшейіп, мемлекеттер арасындағы сенім деңгейі төмендеген.
«Әскери қақтығыстар, “сауда соғысы” жылдан жылға ушығып барады. Бұл әлемдегі ірі мемлекеттер арасындағы өзара сенім дағдарысының және халықаралық жауапкершіліктің әлсіреуінің салдары», – деді Мемлекет басшысы.
Сонымен қатар Президент Таяу Шығыстағы ахуалдың шиеленісуі жаһандық қауіпсіздікке әсер етіп, әлем экономикасына кері ықпал етіп отырғанын атап өтті. Оның айтуынша, халықаралық құқықтың сақталмауы мен халықаралық ұйымдардың беделінің төмендеуі қазіргі күрделі жағдайдың негізгі себептерінің бірі болып отыр.
Соған қарамастан, Мемлекет басшысы Қазақстан ұлттық даму стратегиясын жүйелі түрде жүзеге асырып жатқанын айтты. Ел түрлі сын-қатерлерге қарамастан тұрақты дамуын жалғастырып келеді.