Qyz zorlaǵany úshín 5 jylǵa sottalǵan qazaqstandyq bloger Duman Erqanat jaza túríníń aıyppūlǵa auystyryluyna baılanysty bostandyqqa shyqty, – dep habarlaıdy aqshamnews.kz tílshísí Stan.kz-ke sílteme jasap.
Vedomstvo málímetínshe, sot taǵaıyndaǵan jaza neǵūrlym jeńíl jaza túríne - aıyppūlǵa auystyrylǵan. Osyǵan baılanysty Duman Erqanat qylmystyq-atqaru júıesí mekemesínen shyǵarylǵan.
Komıtet ókílderí mūndaı máselelerdí qarau jáne tıístí sheshím qabyldau tek sottyń qūzyretíne kíretínín atap óttí. Sondaı-aq aıyppūl túríndegí jazany oryndau qylmystyq-atqaru júıesí organdarynyń míndetíne jatpaıtyny aıtyldy.
Būdan bólek, vedomstvo Ákímshílík rásímdík-protsestík kodekstíń 91-babyna sáıkes, eger ótínísh berushí uákílettí organnyń sheshímímen kelíspese, ony zań ayasynda daulauǵa qūqyly ekenín eske saldy.
Al sottalǵan adamnyń jeke ísíne qatysty málímetter Qazaqstan zańnamasyna sáıkes jarıyalanbaıdy.
Eske salaıyq, 2023 jyly ózín jábírlenushí retínde tanystyrǵan qyz bloger tarapynan zorlyq kórgenín málímdegen bolatyn. Onyń sózínshe, 2022 jylǵy jeltoqsanda qarjylyq sauattylyq boıynsha keńes alu úshín Duman Erqanatpen kezdesken kezde oǵan kúsh kórsetílgen.
Osydan keıín boıjetken polıtsıyaǵa aryz jazyp, ís sotqa jetken. 2023 jylǵy 13 qyrkúıekte sot Duman Erqanatty «zorlau» baby boıynsha kínálí dep tanyp, 5 jylǵa bas bostandyǵynan aıyrdy. Sonymen qatar ol jábírlenushíge 3 mln 117 myń teńge ótemaqy tóleuge míndettelgen.
Ís materıaldaryna sáıkes, sot barysynda aıyptalushy kínásín moıyndap, ókínísh bíldíríp, jábírlenushíden keshírím sūraǵan.
Keıín bloger sot sheshímímen kelíspeı, apellyatsıyalyq shaǵym túsírgen. Apellyatsıyalyq sot alǵashqy úkímníń kúshín joıyp, ony aqtap alǵan. Alaıda keıín Joǵarǵy sot būl aqtau úkímín joıdy.
Joǵarǵy sot habarlamasynda: «Qylmystyq ís materıaldaryn zerdeleu barysynda Erqanattyń kínásí dáleldendí. Qorǵaushynyń uájderí jınalǵan dáleldemelermen joqqa shyǵaryldy», – delíngen.