Almaty qalasyndaǵy Balalarǵa shūǵyl medıtsınalyq kómek kórsetu ortalyǵynda balalar neırohırurgıyasyna arnalǵan ekínshí halyqaralyq sheberlík sabaǵy ayaqtaldy. Ís-shara balalardaǵy kúrdelí nevrologıyalyq būzylystardy emdeudíń zamanauı ádísí – sakraldy neırostımulyatsıyany engízuge arnaldy, – dep habarlaıdy aqshamnews.kz tílshísí.
Shara 2–4 sáuír aralyǵynda óttí. Oǵan Mınsk qalasynan shaqyrylǵan joǵary sanatty neırohırurg V.V. Alekseevets qatysyp, «Meloserdıe» qaıyrymdylyq qory qoldau kórsettí. Būl – atalǵan ortalyq úshín Qazaqstandaǵy balalarǵa joǵary tehnologıyalyq medıtsınalyq kómektí damytu jolyndaǵy mańyzdy kezeń.
Úsh kún íshínde ortalyq mamandary halyqaralyq sarapshymen bírlesíp, ortalyq júıke júıesíníń tua bítken aqaulary jáne neırogendík quyq dertí bar 20-ǵa juyq nauqasqa keńes berdí. Ekí balaǵa sakraldy neırostımulyatsıya ádísímen joǵary tehnologıyalyq ota jasaldy. Qazírgí uaqytta, olardyń jaǵdaıy tūraqty, emdeu sharalary jalǵasyp jatyr. Aldaǵy kezeńde 6 aıdan 12 aıǵa deıín sozylatyn baqylau jáne ońaltu úderísí júrgízílíp, ony neırofızıolog mamandar qadaǵalaıdy. Būl kezeńníń basty maqsaty – balalardyń ómír sapasyn jaqsartu.
Sakraldy neırostımulyatsıya ádísí ortalyqta 2025 jyldyń mamyr aıynda engízílíp, qysqa uaqyt íshínde balalar neırohırurgıyasynyń mańyzdy baǵyttarynyń bíríne aınaldy. Qalyptasu kezeńíníń kúrdelílígíne qaramastan, ortalyq būl qyzmettí míndettí áleumettík medıtsınalyq saqtandyru júıesí ayasynda kórsetíp keledí. Būl óz kezegínde Almaty qalasy men elímízdíń barlyq óńírleríndegí balalar úshín zamanauı emdeu tásílderíníń qoljetímdílígín arttyryp otyr.
Ótken sheberlík sabaǵy tájírıbe almasu alańy ǵana emes, mamandardyń kásíbı ósuíne de serpín berdí. Oǵan Taraz, Shymkent, Túrkístan jáne Astana qalalarynan kelgen dárígerlerdí qosa alǵanda, 10-ǵa juyq maman qatysty. Sonymen qatar, elímízdíń ózge óńírlerí de būl baǵyttaǵy oqytuǵa qyzyǵushylyq tanytyp otyr. Būl – atalǵan salany damytuǵa degen sūranystyń joǵary ekenín kórsetedí.
Jūmys qorytyndysy boıynsha ortalyq neırohırurgıyalyq qyzmet túrlerín keńeıtíp, elímízdíń túkpír-túkpírínen joǵary mamandandyrylǵan kómekke mūqtaj nauqastardy qabyldauǵa daıyn ekenín rastady.
«Bízdíń ūjym úshín būl – jaı ǵana tájírıbe almasu emes, balalar neırohırurgıyasyn damytudaǵy mańyzdy qadam. Bíz balalardyń ómír sapasyn jaqsartuǵa naqty múmkíndík bar ekenín kóríp otyrmyz jáne osy baǵyttaǵy jūmysty keńeıtuge daıynbyz», – dedí neırohırurgıya bólímshesíníń meńgerushísí Rahym Ahan.
Ortalyq aldaǵy uaqytta da halyqaralyq sarapshylarmen jáne «Meloserdıe» qaıyrymdylyq qorymen yntymaqtastyqty jalǵastyryp, Qazaqstandaǵy balalar medıtsınasynyń damuyna úles qosudy josparlap otyr.