Kúní keshe jetínshí ret áke atanǵan ánshí Tóreǵalı Tóreálí jańa tuǵan qyzyna qandaı esím bergenín jarıya ettí, – dep habarlaıdy aqshamnews.kz tílshísí.
Óner ıesí áleumettík jelídegí paraqshasynda kenjesíne arnap jazba jarıyalady. Onyń sózínshe, jary Tolqyn tórtínshí ret kesar tílígí arqyly bosanǵandyqtan, ánshí qatty alańdaǵan.
“Allaǵa shúkír, búgín jetínshí perzentím dúnıege keldí. Būl – jaı ǵana jańalyq emes. Būl – ómírdíń jańa tynysy. Jauapkershílíktíń jańa deńgeıí. Tolqynda būl joly tórtínshí ret kesar tílígí boldy. Shynymdy aıtsam, qatty uaıymdadym. Bíraq er adam retínde tek syrttaı kútíp tūrudy emes, osy sáttíń íshínde boludy tańdadym”, – dep jazdy ol.
Ánshí ota barysyn syrttaı baqylap tūrudyń ońaı bolmaǵanyn aıtty. Alaıda sábıdí qolyna alǵan sátte barlyq qorqynyshy seıílgen.
“Qyzymdy óz qolymmen qarsy aldym. Ota ústínde qarap tūru – ońaı emes. Bíraq sol bír sát… ol qorqynyshtan da, auyrlyqtan da bıík tūrdy. Būl – ómírdíń qalaı bastalatynyn kóru. Būl – Allanyń qūdíretín kózben sezínu”, – dep jazdy ol.
Tóreǵalı Tóreálí qyzyna Márıyam degen esím bergen. Onyń aıtuynsha, būl atty naǵashy atasy men ájesí ūsynǵan. Al prodyuser Jan Mūqanov pen onyń jary kíndík áke-sheshsí bolǵan.
“Būl esím – júrekpen qabyldanǵan sheshím. Naǵashy atasy men naǵashy ájesí ekeuí yrymdap, osy atty ūsyndy. Al kíndík ákesí men kíndík sheshesí – meníń prodyuserím Jan Muqanov pen Asyl jeńgem bolatyn boldy. Būl da – sením. Būl da – jaqyndyq”, – dep jazdy ol.
Qazír ánshíníń jarynyń da, qyzynyń da jaǵdaıy jaqsy.
“Márıyam, seníń keluíń – men úshín taǵy bír beles. Men endí tek áke emes, jetí balanyń aldynda jauapty adammyn. Jolyń jaryq bolsyn. Ómíríń nūrly bolsyn. Ákeń árdaıym janyńda. 19:00 / 07.04.2026”, – dep jazdy ánshí.