Qazaqtyń jyrshylyq dástúríníń eń bıík shyńdarynyń bírí – Jambyl Jabaev. Onyń óleńderí ǵasyrlar boıy eldík ruhtyń, erlík pen adamgershílíktíń asyl aınasyna aınalyp keledí.
Ūlt ruhanıyatyndaǵy osyndaı ūly tūlǵanyń 180 jyldyq mereıtoıyna oraı Ál‑Farabı atyndaǵy Qazaq Ūlttyq unıversıtetí kolledjí men «Órkenıet álemí» qoǵamdyq bírlestígí bírlesíp, oqu ornynyń akt zalynda «Jyr alyby – Jambyl» atty ádebı-tanymdyq kesh ótkízdí.
Ruhanı mazmūnǵa baı shara qazaq ádebıetíníń alyp tūlǵasyna taǵzym jasap qana qoımaı, jas ūrpaqtyń ūlttyq mūraǵa degen qūrmetín arttyrudy, tarıhı tanymyn tereńdetudí maqsat ettí. Kesh barysynda Jambyl jyrlaryndaǵy eldík ruh, adamgershílík mūrattar men otansúıgíshtík ıdeyalar keńínen sóz boldy.
Sharanyń ótuíne kolledj dırektory Appakova Madına Nesípbekqyzy qoldau kórsetíp, oqu ordasynda ūlttyq qūndylyqtardy dárípteu baǵytyndaǵy jūmystardyń júıelí túrde júzege asyp kele jatqanyn atap óttí. Onyń basshylyǵymen bílím men tárbıe sabaqtastyǵyna negízdelgen ıgí bastamalar jalǵasyn tabuda.
Ádebı keshtí ūıymdastyruǵa ūıytqy bolǵan – tárbıe ísí jóníndegí orynbasary Idrısova Gúljan Asanqyzy. Ol keshtíń tárbıelík jáne mazmūndyq mańyzyna erekshe mán beríp, sharanyń joǵary deńgeıde ótuíne atsalysty. Keshtí saltanatty túrde dırektordyń oqu ísí jóníndegí orynbasary Erǵalı Dınara Erǵalıqyzy ashyp, Jambyl mūrasynyń tarıhı mańyzy men ruhanı tereńdígíne toqtaldy.
Kesh moderatory Jasūlan Baıǵaraev baǵdarlamany sheber úılestíríp, ár bólímníń bír-bírímen sabaqtastyǵyn saqtaı bíldí. Onyń sahnadaǵy erkíndígí men kásíbı júrgízushílík sheberlígí ruhanı keshtíń áserlí ótuíne yqpal ettí.
Kolledjdíń qazaq tílí men ádebıetí páníníń oqytushysy Ásembaeva Altyn Shákírjanqyzy «Jambyl Jabaevtyń ómír joly men shyǵarmashylyǵy» taqyrybynda mazmūndy bayandama jasap, aqynnyń jyraulyq dástúrdegí ornyna, aıtys óneríndegí sheberlígíne jáne eldík ruhty kóterudegí tarıhı mıssıyasyna keńínen toqtaldy. Ol óz sózínde Jambyl poezıyasynyń basty ózegí – halyq taǵdyry, eldík namys jáne adamdyq asyl qasıetter ekenín atap óttí.
Jambyl jyrlary qaı kezeńde de halyqtyń ruhyn kótergen. Sonyń aıqyn dálelí – aqynnyń áıgílí «Lenıngradtyq órením» óleńí. Ekínshí dúnıejúzílík soǵysy kezínde qorshauda qalǵan qala tūrǵyndaryna arnalǵan būl jyr tek óleń ǵana emes, úmít pen senímníń úníndeı boldy. Aqynnyń júrekten shyqqan sózderí maıdan men tyldaǵy halyqtyń boıyna quat beríp, jeńíske degen senímín nyǵaıtty. Osy arqyly Jambyl poezıyasy erlík pen eldíktíń, patrıottyq ruhtyń kórkem úlgísíne aınaldy.
Kesh barysynda kolledj studentterí Nūrhadısha Nūrdáulet, Ernat Toıshy, Ádemí Suyumbekova, Anel Erqalı, Ayajan Auken, Imanǵalı Akımhan, Ūljarqyn Sembek jáne Ayaulym Qaırollaeva aqyn jyrlarynan úzíndíler oqyp, kórermenderdíń yqylasyna bólendí. Árbír student Jambyl poezıyasynyń ór ruhyn áserlí jetkízíp, sahnalyq mádenıetín kórsete bíldí.
Mahabbat Danıyarqyzy Jambylǵa arnaǵan avtorlyq jyryn oqyp, keshtíń mazmūnyn baıyta tústí. Al Aıdana Aıtahun men Abylhan Alıhan dombyra men jetígende kúı oryndap, qazaq muzykasynyń syrly únín asqaqtatty. Ūlttyq áuen ruhanı keshtíń kórkemdík bolmysyn aıqyndaı tústí.
Sondaı-aq kolledj ūstazy Turegeldıeva Aqjarqyn Seríkbaıqyzy da sharanyń mazmūndy ótuíne belsene atsalysty.
Ádebı keshtíń qūrmettí qonaǵy – Jambyl Jabaevtyń shóberesí, aqyn, sazger, audarmashy, zańger árí ánshí Būlan Jambyl studenttermen júzdesíp, atasy turaly tyń derektermen bólístí. Ol Jambyldyń shyǵarmashylyq bolmysy men adamı qasıetterí jaıly taǵylymdy áńgímeler aıtyp, aqyn óleńderíne jazylǵan ánderín dombyramen oryndap, kópshílíktíń ystyq yqylasyna bólendí.
Sonymen qatar «Órkenıet álemí» qoǵamdyq bírlestígíníń qūryltaıshylarynyń bírí, Qazaqstan Respublıkasynyń mádenıet qaıratkerí, qoǵam belsendísí, ánshí Nūrjamal Áshímhan keshke arnaıy qatysyp, student jastarǵa taǵylymdy oılaryn jetkízdí. Ol Jambyl mūrasynyń ūlttyq ruhanıyattaǵy orny turaly áserlí áńgíme aıtyp, jandy dauysta án oryndap, kórermenderdí erekshe áserge bóledí.
Kesh sońynda ūıymdastyrushylar men belsendí studentterge «Órkenıet álemí» qoǵamdyq bírlestígíníń arnaıy marapattary men sertıfıkattary tabystaldy.
«Jyr alyby – Jambyl» atty ádebı-tanymdyq kesh – ūlt ruhanıyatyn ūlyqtaǵan, jas ūrpaqtyń júregíne otansúıgíshtík sezímín ūyalatqan, ádebıet pen ónerge degen qūrmetín arttyrǵan taǵylymdy basqosu retínde este qaldy.
Jambyl jyry – halyq jyry. Ol ótken dáuírdíń ǵana úní emes, búgíngí ūrpaqtyń ruhyn kóteretín, eldík pen adamgershílíkke úndeıtín máńgílík mūra.
Alma Seríkqalı
Qazaqstan Jurnalıster Odaǵynyń múshesí
